सोलापूरातील करमाळा तालुक्यातील आदिनाथ सहकारी साखर कारखान्याच्या झालेल्या अत्यंत चुरशीच्या निवडणुकीत आमदार नारायण पाटील गटाचे पोमलवाडी गटातील तीनही उमेदवार विजयी झाले आहेत. आमदार नारायण पाटील गटाचे पोमलवाडी गटातील किरण कवडे, नवनाथ झोळ, संतोष पाटील यांचा 1734 मतांनी विजय झाला आहे. त्यामुळे विधानसभा निवडणुकीतील मोठ्या पराभवानंतर नव्याने कामाला लागलेल्या माजी आमदार संजय शिंदे यांना पुन्हा एकदा पराभवाचे तोंड पाहावे लागले आहे.
आदिनाथ सहकारी साखर कारखान्याच्या निवडणूकीत आतापर्यंत जाहीर झालेल्या 10 जागांच्या निकालापैकी 10 जागांवर आमदार नारायण पाटील गटाचे डॉ. हरिदास केवारे, श्रीमान चौधरी, महादेव पोरे, दत्तात्रय गव्हाणे, रविकिरण फुके, दशरथ हजारे,आबासाहेब अंबारे, किरण कवडे, नवनाथ झोळ, संतोष पाटील हे 10 उमेदवार विजयी घोषीत करण्यात आले आहेत.
पोमलवाडी गटाचे विजयी उमेदवार
आमदार नारायण पाटील गटाचे पोमलवाडी गटाचे उमेदवार
किरण कवडे – 8571
नवनाथ झोळ – 8343
संतोष पाटील – 8328
माजी आमदार संजयमामा शिंदे गटाचे उमेदवार
दशरथ पाटील – 6701
बबन जाधव – 6837
नितीन राजे भोसले – 6708
रामदास झोळ गटाचे उमेदवार
प्रा रामदास झोळ – 1137
भरत जगताप – 766
प्रकाश गिरंजे – 765
पहिल्या फेरीतच पाटील गटाची आघाडी
करमाळा तालुक्यातील श्री आदिनाथ सहकारी साखर कारखान्याच्या निवडणुकीत आमदार नारायण पाटील यांच्या नेतृत्वाखालील पॅनेलने मतमोजणीच्या पहिल्या फेरीतच सुमारे दीड ते दोन हजार मतांनी आघाडी घेतली होती. आदिनाथ कारखान्याच्या झालेल्या निवडणूकीत आमदार नारायण पाटील, माजी आमदार संजय शिंदे, दत्तकला शिक्षण संस्थेचे अध्यक्ष प्रा. रामदास झोळ यांचे तीन पॅनेल निवडणुकीच्या रिंगणात उतरले होते. निवडणुकीच्या रिंगणात तीन पॅनेल असले तरी खरी लढत ही आमदार नारायण पाटील आणि माजी आमदार संजय शिंदे यांच्या पॅनेलमध्येच झाली आहे.