महामुंबईतील प्रवाशांना नव्या रेल्वे मार्गाचा पर्याय उपलब्ध व्हावा यासाठी पनवेल-कर्जत नवीन उपनरीय मार्गाचे काम वेगाने सुरू आहे. प्रकल्पातील २.६ किमीच्या बोगद्याचे खोदकाम पूर्ण झाले आहे. बोगद्याचे खोदकाम जून अखेर पर्यंत पूर्ण करण्याची काळमर्यादा होती. मात्र काटेकोर नियोजनामुळे जूनच्या पहिल्या आठवड्यात खोदकाम पूर्ण करण्यात आले आहे. आता बोगद्यातील अन्य कामे करण्यात येणार आहे, असे मुंबई रेल्वे विकास महामंडळाचे अध्यक्ष व व्यवस्थापकीय संचालक सुभाषचंद गुप्ता यांनी सांगितले.
मुंबईपासून पनवेलमार्गे कर्जत जाण्याचा पर्याय या नव्या रेल्वे मार्गामुळे उपलब्ध होणार आहे. कल्याण मार्गे कर्जत जाण्यापेक्षा कमी वेळ या मार्गाने लागणार असल्याने प्रवाशांच्या वेळेत बचत होईल. पनवेल-कर्जत या नव्या शहरांचा विकास यामुळे वेगाने होईल, असा विश्वास रेल्वे अधिकाऱ्यांचा आहे.
एमआरव्हीसीच्या मुंबई नागरी परिवहन प्रकल्प ३ (एमयूटीपी-३) अंतर्गत पनवेल-कर्जत लोकल आकार घेत आहे. या रेल्वे मार्गावर नढाल, किरवली आणि वावर्ले असे तीन बोगदे उभारण्यात येणार आहेत. यापैकी वावर्ले हा बोगदा २६०० मीटर लांबीचा आहे. नढालची लांबी २१९ मीटर आणि किरवलीची लांबी ३०० मीटर आहे.
ठाणे-दिवा दरम्यान असलेला पारसिक बोगदा हा महामुंबईतील सध्याचा सर्वाधिक लांबीचा अर्थात १.३ किमीचा बोगदा आहे. १९१६ मध्ये वाहतुकीसाठी हा खुला करण्यात आला होता. या बोगद्या व्यतिरिक्त दोन उड्डाणपूल उभारण्यात येणार असून कर्जत जवळील उड्डाणपूल १,२२५ मीटर आणि पनवेललगत १,३७५ मीटरचा आहे. मार्च २०२५ पर्यंत प्रकल्पाचे काम पूर्ण करण्याचे लक्ष्य निश्चित करण्यात आले आहे.
नवीन पनवेल-कर्जत उपनगरीय रेल्वे मार्ग
– खर्च – २,७८२ कोटी
– स्थानक – एकूण ५ (पनवेल, चिखली, मोहापे, चौक, कर्जत )
– रेल्वे मार्गिकांची एकूण लांबी – ३० किमी
– उड्डाणपूल – २
– बोगदे – ३
– पूल – ४४ ( ८ मोठे पूल, ३६ लहान पूल)
– आरओबी/आरयूबी – ५ रोड ओव्हर ब्रीज, १५ रोड अंडर ब्रीज, रुळ ओलांडणीसाठी एक पादचारी पूल