आपल्या घरात सहज उपलब्ध होणारा पण अनेकदा ‘आजारी माणसाची भाजी’ म्हणून थोडा दुर्लक्षित केला जाणारा म्हणजे हा दुधी! पण तुम्हाला माहिती आहे का, की हा साधा दिसणारा दुधी भोपळा आरोग्याचा खजिना आहे? विशेषतः त्याचा ताजा रस नियमित प्यायल्यास शरीराला अनेक फायदे मिळू शकतात. उन्हाळ्याच्या दिवसात तर हा रस म्हणजे वरदानच ठरू शकतो,
दुधीचा रस प्याल्यास काय होत ?
1. भरपुर व्हिटॅमिन : दुधी व्हिटॅमिन सी, व्हिटॅमिन बी, कॅल्शियम, मॅग्नेशियम, पोटॅशियम, लोह आणि भरपूर फायबर यांसारखे अनेक महत्त्वाचे पोषक घटक असतात. हे घटक मिळून आपल्या शरीरावर अनेक सकारात्मक परिणाम करतात.
2. वजन नियंत्रणात मदत: जर तुम्ही वजन कमी करण्याचा प्रयत्न करत असाल, तर दुधीचा रस तुमच्यासाठी उत्तम पर्याय ठरू शकतो. यात कॅलरीज आणि फॅट खूप कमी असतं आणि फायबर भरपूर असल्यामुळे पोट भरल्यासारखं वाटतं, ज्यामुळे उगाच काहीतरी खाण्याची इच्छा कमी होते.
3. त्वचेसाठी आणि केसांसाठी वरदान: दुधीचा रस शरीरातील विषारी घटक बाहेर टाकण्यास मदत करतो, ज्यामुळे त्वचा आतून स्वच्छ आणि चमकदार होते. तसेच, यातील पोषक तत्त्वांमुळे केसांचे आरोग्य सुधारण्यास आणि केस गळती कमी होण्यासही मदत मिळू शकते.
4. पचनसंस्था सुधारते: फायबर आणि पाण्याची जास्त मात्रा असल्यामुळे दुधीचा रस पचनसंस्थेसाठी खूप फायदेशीर आहे. बद्धकोष्ठता, गॅस आणि ॲसिडिटी सारख्या समस्या कमी होतात आणि पोट साफ राहण्यास मदत मिळते.
5. ब्लड प्रेशर नियंत्रणात ठेवण्यास सहाय्यक: दुधी भोपळ्यात पोटॅशियम आणि फायबर चांगल्या प्रमाणात असतं, जे रक्तदाब नियंत्रणात ठेवण्यास मदत करू शकतं. उच्च रक्तदाबाचा त्रास असणाऱ्यांसाठी हा रस फायद्याचा ठरू शकतो.
6. तणाव कमी होतो: दुधी भोपळ्यामध्ये असलेले काही घटक आणि त्याचा थंड गुणधर्म मज्जासंस्थेला शांत करण्यास मदत करतो, ज्यामुळे मानसिक तणाव आणि चिंता कमी होण्यास मदत मिळू शकते.
कसा आणि कधी प्यावा रस?
दुधीचा रस शक्यतो ताजा काढून प्यावा. सकाळी रिकाम्या पोटी एक ग्लास रस पिणे अधिक फायदेशीर मानले जाते. चवीसाठी तुम्ही त्यात थोडं काळं मीठ, जिरेपूड किंवा पुदिन्याची पानं घालू शकता.
महत्त्वाची सूचना: रस काढण्यापूर्वी दुधी थोडा चाखून बघावा. जर तो कडू लागत असेल, तर त्याचा रस पिऊ नये, कारण कडू दुधी आरोग्यासाठी हानिकारक असू शकतो.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)