उपाययोजना नाही
‘महावितरण’कडे वारंवार तक्रारी करूनही याबाबत कोणतीही ठोस उपाययोजना होत नसल्याचा आरोप उद्योजकांनी केला आहे. चाकण एमआयडीसीमध्ये हजारो लहान-मोठ्या कंपन्या आहेत. लाखो कामगारांना या कंपन्यांमुळे रोजगार प्राप्त झाला आहे. मात्र, गेल्या काही महिन्यांपासून या परिसरात विजेची मोठी समस्या निर्माण झाली आहे. चाकण एमआयडीसीमध्ये वारंवार वीजपुरवठा खंडित होत आहे.
उत्पादनावर परिणाम
विजेच्या या समस्येचा परिणाम थेट कंपन्यांच्या उत्पादन क्षमतेवर झाला आहे. वीजपुरवठा होत नसल्याने कामगार पुरेशा क्षमतेने काम करू शकत नाही. त्यामुळे कंपन्यांचे उत्पादन कमी होत आहे. उत्पादन कमी झाल्यामुळे आर्थिक नुकसान होत आहे. त्यामुळे कामगारांचे पगार करता येत नाहीत. बँकेचे हप्तेही थकले आहेत. मशीनच्या देखभाल-दुरुस्तीसाठी अधिक खर्च येत असल्याचे निरीक्षण उद्योजकांनी मांडले.
‘महावितरण’सोबत बैठक
फेडरेशन ऑफ चाकण इंडस्ट्रीजने विजेच्या समस्येबाबत ‘महावितरण’चे विभागीय संचालक अंकूश नाळे यांच्यासोबत नुकतीच बैठक घेतली. नाळे यांच्यासमोर संस्थेच्या सदस्यांनी विजेसंदर्भातील विविध समस्यांचा पाढा मांडला. फेडरेशन ऑफ चाकण इंडस्ट्रीजचे सचिव दिलीप बटवाल, फेडरेशनचे संचालक मनोज बंसल, गॅब्रियल कंपनीचे व्यवस्थापक विनोद राजधान, पूना प्रेसिंगचे संजय गुप्ता, एडविकचे नितीन सावंत, निखिल अग्रवाल आदींसह एकूण ७० कंपन्यांचे प्रतिनिधी या वेळी उपस्थित होते.
अधिकाऱ्यांना घेतले फैलावर
‘महावितरण’चे विभागीय संचालक अंकुश नाळे यांनी फेडरेशनच्या सदस्यांच्या समस्या ऐकून घेतल्यानंतर ‘महावितरण’च्या स्थानिक अधिकाऱ्यांना फैलावर घेतले. ‘महावितरण’मध्ये कोणत्याही प्रकारचा अनगोंदी कारभार खपवून घेतला जाणार नाही. प्रत्येक अधिकाऱ्याने चाकण एमआयडीसीतील विजेची समस्या सोडविण्यासाठी सतर्क राहायला हवे; तसेच चाकण येथील विजेच्या पायाभूत सुविधांसाठी ‘महावितरण’ने ४० कोटी रुपयांचा डीपीआर बनवला आहे. येत्या एक-दोन महिन्यात अनेक कामे मार्गी लागून, विजेचा प्रश्न सुटण्यास मदत होईल. मी स्वतः चाकणमधील कामांचा दररोज आढावा घेत जाईल, असे आश्वासन नाळे यांनी दिले.
चाकण एमआयडीसीमध्ये मोठ्या प्रमाणात विजेची समस्या भेडसावत आहे. वीज खंडित होत असल्याने कंपन्यांना किती नुकसान होत आहे, उत्पादन क्षमतेवर किती परिणाम होतो, याची सविस्तर माहिती ‘महावितरण’ला दिली. त्यानंतर अखंडित वीजपुरवठा करण्याचे आश्वासन ‘महावितरण’ने दिले.
– दिलीप बटवाल, सचिव, फेडरेशन ऑफ चाकण इंडस्ट्रीज