Ladki Bahin Yojana: ‘लाडक्या बहिणी’ मेटाकुटीस; नाशिक जिल्हाधिकारी कार्यालयाच्या आवारात एजंटांनी थाटली दुकाने
मुख्यमंत्री माझी लाडकी बहीण योजनेचा लाभ घेण्यासाठी रहिवासी आणि उत्पन्नाच्या दाखल्याबाबतच्या अटी सरकारने शिथिल केल्या असल्या तरी त्याबाबत काही अपप्रवृत्तींकडून दिशाभूल सुरू झाली आहे. सरकारचे नियम कधीही बदलू शकतात. त्यांची काही गॅरंटी नाही, असे सांगत नागरिकांना दाखले काढण्यासाठी प्रवृत्त करीत त्यांच्याकडून पैसे उकळण्याचा धंदा शहरासह जिल्ह्यात तेजीत सुरू झाला आहे. दाखले व रेशनकार्डाशी संबंधित कामे मार्गी लावण्यासाठी बक्कळ पैसे घेणाऱ्या एजंटांनी तहसीलदारांच्या दालनासमोरच दुकाने थाटली असून, मुख्यमंत्र्यांच्या लाडक्या बहिणींची आर्थिक लूबाडणूक सुरू झाली आहे.