आयआयटी मुंबईने पुलांचे ऑडिट केले असता मुंबई सेंट्रल व ग्रँट रोड दरम्यान असलेला बेलासिस पूल धोकादायक झाल्याने पुलाची तातडीने दुरुस्ती किंवा नवीन बांधण्याची शिफारस केली होती. त्यानुसार हा पूल पाडून नव्याने बांधण्याचा निर्णय घेण्यात आला आहे. पश्चिम रेल्वे या पुलासाठी २४ कोटी रुपये खर्च करणार असून कामाचा सर्वाधिक भार मुंबई महापालिका उचलणार आहे.
पुलाचा रेल्वे रुळांवरील भाग पाडून त्याच्या पुनर्बांधणीसाठी पश्चिम रेल्वेने कंत्राटदार नियुक्त केला आहे. महापालिकेने आपल्या हद्दीतील कामासाठी कंत्राटदार नियुक्त केला आहे. पुलाची उभारणी सन १८९३ मध्ये करण्यात आली आहे. पुलाची लांबी ३८० मीटर आणि रुंदी २२.२० मीटर आहे. यापूर्वी पूल बंद करण्यासाठी पश्चिम रेल्वे प्रशासनाकडून १ डिसेंबर २०२३ ही तारीख जाहीर करण्यात आली होती. मात्र, पूलावरील वाहतूक बंद करण्यासाठी वाहतूक पोलिसांकडून परवानगी मिळालेली नव्हती. नव्याने उभारण्यात येणाऱ्या पुलाची उंची वाढवण्यात येणार आहे. सध्या रुळांपासून पाच मीटर असून नव्याने उभारण्यात येणाऱ्या पूलाची उंची साडेसहा मीटर असणार आहे.
अवजड वाहनांना बंदी
बेस्टच्या मुंबई सेंट्रल आगाराच्या अखत्यारीतील मुंबई सेंट्रल रेल्वे स्थानक पूल दुरुस्तीच्या कामासाठी शनिवार, ११ मे रोजी मध्यरात्रीपासून अवजड वाहने/ बसगाड्यांना दोन्ही दिशेने प्रवेश बंद करण्यात आला आहे. त्यामुळे काही बसमार्गांत बदल करण्यात आले आहेत.
‘डाऊन’ दिशेने ताडदेवकडून येताना बसमार्ग क्रमांक ६३, ६७, १२४, १२५, १३६, १३२, ३५१, ३५७ या सर्व बस मुंबई सेंट्रल पूल, जहांगीर बोमन मार्ग (बेलासिस मार्ग) येथून न जाता लोकशाहीर पठ्ठे बापूराव मार्गावरून (डायना ब्रीज) सरळ नवजीवन सोसायटी सिग्नल येथे डावे वळण घेऊन, दादासाहेब भडकमकर मार्ग (लॅमिंग्टन रोड) व्हाया बसमार्ग क्र. ६६/८२ मार्गे मुंबई सेंट्रल स्थानक सिग्नल (डॉ. हमीद चौक) येथे उजवे वळण घेऊन, नंतर नेहमीच्या मार्गाने जाणार आहेत.
‘अप’ दिशेच्या वरील सर्व बसगाड्या याचप्रमाणे डॉ. हमीद चौकाला डावे वळण व नवजीवन सोसायटीला उजवे वळण घेऊन डायना ब्रिज मार्गे ताडदेव येथून पुढे नेहमीच्या मार्गाने जाणार आहेत. मुंबई सेंट्रल रेल्वे स्थानकाला समांतर बसथांबे डायना ब्रिजवर देण्यात आले आहेत, अशी माहिती बेस्टकडून देण्यात आली आहे.