संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांच्या आषाढीवारी पालखी सोहळ्याच्या अनुषंगाने महापालिकेच्या वतीने पुरविण्यात येणाऱ्या विविध सेवासुविधांचे आणि इतर नियोजन करण्यासाठी आयुक्त शेखर सिंह यांच्या अध्यक्षतेखाली आढावा बैठक झाली. त्या वेळी सिंह बोलत होते.
बैठकीस अतिरिक्त आयुक्त प्रदीप जांभळे पाटील, उल्हास जगताप, सहआयुक्त चंद्रकांत इंदलकर, ‘स्मार्ट सिटी’चे सहमुख्य कार्यकारी अधिकारी किरणराज यादव, मुख्य माहिती व तंत्रज्ञान अधिकारी निळकंठ पोमण, आरोग्य वैद्यकीय अधिकारी डॉ. लक्ष्मण गोफणे, मुख्य सुरक्षा अधिकारी उदय जरांडे, अतिरिक्त आरोग्य वैद्यकीय अधिकारी डॉ. अभयचंद्र दादेवार आदी उपस्थित होते.
वारकऱ्यांच्या मुक्कामाच्या ठिकाणी आवश्यक सुविधा उपलब्ध करून दिल्या जाणार आहेत. मुक्कामाच्या ठिकाणी रस्त्यावरील आणि पालखी मार्गावरील राडारोडा उचलण्याचे निर्देश देण्यात आले आहेत. पालखीच्या मार्गावर व कार्यक्रमांच्या ठिकाणी, मुक्कामाच्या व विसाव्याच्या ठिकाणी साफसफाई, जंतुनाशक फवारणी, महिला व पुरुषांकरिता स्वतंत्र फिरते शौचालये आदी सुविधा पुरविण्याबाबतही निर्देश देण्यात आले आहेत.
पालखी मार्गावर आणि मुक्काम आणि विसाव्याच्या ठिकाणी सॅनिटरी नॅपकिन व्हेंडिंग व सॅनिटरी नॅपकीन बर्निंग मशिन ठेवण्यात येणार आहेत. पालखी मार्गावर वैद्यकीय पथकासह रुग्णवाहिकेची व्यवस्थाही करण्यात येणार आहे. पालखी सोहळा कालावधीत वारकऱ्यांसाठी महापालिकेच्या दवाखान्यात मोफत वैद्यकीय सुविधा २४ तास उपलब्ध असतील. फिरता दवाखानाही उपलब्ध करून देण्यात येणार आहे. पालखी मुक्काम, विसावा,स्वागत कक्ष आणि पालखी मार्गावर योग्य त्या ठिकाणी सीसीटीव्ही कॅमेरे बसविणार आहेत. सुरक्षेच्या दृष्टीने ड्रोन कॅमेऱ्यांची व्यवस्थाही करण्यात येणार आहे.
आयुक्तांनी दिलेल्या सूचना
– पालखी मार्गावर पावसाचे पाणी तुंबणार नाही याची दक्षता घ्यावी. वेळोवेळी पाहणी करून खड्डे बुजवावेत.
– आपत्कालीन परिस्थितीसाठी नेमलेल्या पथकाने आवश्यक ठिकाणी पाहणी करून योग्य ती कार्यवाही करावी.
– आकुर्डीमधील पालखी मुक्कामाच्या ठिकाणी आवश्यक व्यवस्था करावी
– मुक्कामाच्या ठिकाणी पार्किंगचे आणि महापालिकेमार्फत पुरविण्यात येणाऱ्या सुविधांविषयीचे फलक लावावेत.
– पालखी मुक्कामाच्या ठिकाणी नियंत्रण कक्ष उभारावा
– महापालिका हद्दीतील पालखी प्रवास मार्गाचा नकाशा तयार करावा आणि प्रत्येक २०० मीटरमधील नियोजनासाठी नियंत्रित आराखडा तयार करावा.
– कोठेही रस्त्यांचे काम सुरू असल्यास तेथे पक्की बॅरिकेड उभारावीत.
– पालखी मार्गावरील अतिक्रमणे हटवावीत. पालखी मार्गावर पिण्याच्या स्वच्छ पाण्याची व्यवस्था करावी.