उत्तर मध्य मुंबई लोकसभा मतदारसंघाचे महायुतीचे उमेदवार उज्ज्वल निकम आणि उत्तर पूर्व मुंबई लोकसभा मतदारसंघात मिहीर कोटेचा यांच्या प्रचारासाठी आयोजित प्रचारसभेत त्यांनी वरील टीका केली. यावेळी फडणवीस यांनी पुन्हा एकदा शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे यांच्यावर निशाणा साधला. मुंबईतील झोपडीवासींचे आहे तिथेच पुर्नवसन करण्याचा निर्धारही त्यांनी यावेळी व्यक्त केला.
यावेळी देवेंद्र फडणवीस म्हणाले की, ‘लोकसभेची ही निवडणूक गल्लीसाठी नाही, तर दिल्लीतील नेता निवडायची निवडणूक आहे. भाजप उमेदवाराला दिलेले मत पंतप्रधान नरेंद्र मोदी यांना जाणार आहे. आमचे पंतप्रधान पदाचे उमेदवार मोदी आहेत. काँग्रेसच्या ‘इंडिया’ आघाडीचे पंतप्रधान पदाचे उमेदवार कोण, हे सांगता येत नाही. ठाकरेंचा सकाळचा भोंगा म्हणतो, पाच वर्षांत पाच पंतप्रधान देऊ. या देशाचे पंतप्रधान पद म्हणजे संगीत खुर्चीचा खेळ आहे का?’
Yamini Jadhav : आरोप सिद्ध होईपर्यंत आम्ही निर्दोषच, ठाकरेंना सोडल्याचा पश्चाताप नाही, यामिनी जाधव यांच्या भावना
‘काँग्रेसने आपला फणा काढत पोलिस अधिकारी हेमंत करकरे यांच्या हौतात्म्यावर प्रश्नचिन्ह लावले. काँग्रेसवाले हे सर्व बोलत असताना, उद्धव ठाकरे मात्र तोंड बंद करून बसले आहेत. त्यांना आता सर्वसामान्यांची चिंता राहिली नाही. ठाकरे आता मूठभरांची चिंता करत आहेत. त्या मूठभर मतांसाठी उद्धव ठाकरे तोंड बंद करून बसले आहेत. पण, जे देशाच्या विरोधात आहेत त्यांना सोडणार नाही, मग, तो कोणीही असो,’ या शब्दांत देवेंद्र फडणवीस यांनी उद्धव ठाकरे यांना लक्ष्य केले.
Read Latest Maharashtra News Updates And Marathi News
‘मुंबईचा चेहरामोहरा बदलला’
‘आम्हाला जेव्हा सत्तेची संधी मिळाली, तेव्हा मुंबईचा चेहरामोहरा बदलला. मेट्रोचे जाळे निर्माण केले. त्यामुळे लोकांना गर्दीत किंवा वाहतूककोंडीत थांबण्याची गरज भासणार नाही. इतकी वर्षे इथे सांडपाणी मुंबईच्या समुद्रात तसेच सोडले गेले. आम्ही एसटीपीचे प्रकल्प सुरू केले. तीन वर्षांत हा प्रकल्प पूर्ण होईल, तेव्हा एक थेंबही घाण पाणी समुद्रात जाणार नाही,’ असे फडणवीस यांनी यावेळी जाहीर केले.