तासाभरात पुण्यात ४०.४ मिलीमीटर पावसाची नोंद, पुढील दोन दिवस ढगाळ वातावरण राहण्याची शक्यता

पुणे: शहरात सलग तिसऱ्या दिवशी संध्याकाळी वादळी वाऱ्यासह जोरदार हजेरी लावलेल्या पावसाने प्रशासकीय यंत्रणेची अन् नागरिकांची दाणादाण उडवली. मध्यवर्ती पुण्यासह तासभर बरसलेल्या पावसामुळे रस्ते जलमय झाले होते. कामासाठी घराबाहेर पडलेल्या, अन् कामावरून घरी परतणाऱ्या नागरिकांना पावसाचा जोर ओसरेपर्यंत आसरा घेऊन थांबावे लागले. अवघ्या तासाभरात पुण्यात ४०.४ मिलीमीटर पावसाची नोंद झाली. पुढील दोन दिवस पावसाला अनुकूल वातावरण असल्याने आकाश अंशत: ढगाळ राहणार असून दुपारनंतर पाऊस पडणार असल्याची शक्यता भारतीय हवामानशास्त्र विभाग (आयएमडी)ने व्यक्त केली आहे.शहरात लोकसभा निवडणुकीचे वातावरण तापले असताना पुण्यात गेल्या आठवड्यात उष्णेतच्या लाटेमुळे वातावरणही गरम झाले होते. मात्र गेल्या दोन दिवसांपासून पावसाने हजेरी लावल्यामुळे नागरिकांना उन्हापासून काहीसा दिलासा मिळाला आहे. शहरात शनिवारी दुपारी तीनपर्यंत उन्हाचा चटका जाणवत होता, त्यानंतर हळूहळू ढग दाटून आले आणि काळोख पसरला. सायंकाळी पाचच्या सुमारास वादळी वारे सुटले आणि ढगांचा गडगडाटही सुरू होता. सहाच्या सुमारास टप्प्याटप्प्याने शहराच्या वेगवेगळ्या भागात पावसाला सुरूवात झाली आणि नागरिकांची धांदल उडाली. पावसाचा जोर बघून नागरिकांनी रस्त्याच्या कडेला आडोसा घेऊन थांबणेच पसंत केले. कामावरून घरी जाणाऱ्या नागरिकांना अर्ध्या रस्त्यात गाठल्याने, त्यांची धावपळ झाली. उपनगरांबरोबरच जिल्ह्याच्या सर्वच भागात जोराचा पाऊस पडला. दरम्यान, पावसामुळे कमाल तापमानात घट होऊन दिवसभरात ३७.८ आणि किमान २१.२ अंश सेल्सिअस तापमान नोंदवले गेले.
Loksabha Election च्या चौथ्या टप्प्यासाठी महाराष्ट्रातील ११ जागांवर मतदान, जाणून घ्या कुणामध्ये होणार लढत?

मावळात विजेचा कडकडाट आणि मेघगर्जनेसह जोरदार पाऊस

मावळ तालुक्यात शनिवारी सायंकाळी ठिकठिकाणी सोसाट्याच्या वारा, विजेचा कडकडाट आणि मेघगर्जनेसह जोरदार पाऊस झाल्याने अनेकांची तारांबळ उडाली आहे. सायंकाळी जोरदार वारा वाहू लागला. अनेक ठिकाणी वीजपुरवठा खंडित करण्यात आल्याने सर्वत्र अंधार पसरला होता. दुपारी साडेचारच्या दरम्यान काही ठिकाणी पावसाने हजेरी लावली होती. त्यानंतर पुन्हा एकदा सायंकाळी सात ते साडेसात वाजता तळेगाव, नवलाख उंबरे, वडगाव , देहूरोड, कामशेत तसेच मळवली व लोणावळा भागात जोरदार पाउस पडला. पावसामुळे शनिवारी ठिकठिकाणी सुरू असलेल्या विवाह सोहळ्यासह विविध धार्मिक कार्यक्रमांना हजेरी लावणाऱ्या नागरिकांची तारांबळ उडाली.

भोरमध्ये जोरदार पावसाची हजेरी

भोर आणि परिसरात साडेपाचच्या सुमारास पावसाने जोरदार हजेरी लावल्यामुळे उकाड्याने हैराण झालेल्या नागरिकांना दिलासा मिळाला आहे.पंधरा दिवसापासून नागरिक उकाड्याने हैराण झाले आहेत.गेल्या आठवड्यात काही भागात पावसाच्या तुरळक सरी पडल्या. त्यामुळे हवेतील उष्मा अधिक वाढला होता. शनिवारी झालेल्या पावसामुळे हवेत काहीसा गारवा निर्माण झाला. अर्धा तास रस्त्यावर पाण्याचे लोट वाहत होते.विसगांव, अंबवडे, हिरडोशी खोरे, पूर्व भागात पाऊस पडल्याचे नागरिकांनी सांगितले.

झाडे पडली

वादळी पावसामुळे शहरात दोन दिवसात ५४ झाडे पडली. तर शनिवारी दिवसभरात झाडपडीच्या ३० घटना घडल्या. लोहगाव, ढोले पाटील रस्ता, पद्मावती पंपिंग स्टेशन, सहकार नगर, औंध, गुरुवार पेठ, एनआयबीएम रस्ता, घोरपडी पेठ, कसबा पेठ, धानोरी, कर्वेनगर, खडकमाळ आळी, महात्मा गांधी रस्ता, शिवाजीनगर, महर्षीनगर, राजेंद्र नगर, विमाननगर, बाणेर आणि शनिवार वाड्यासह विविध ठिकाणी झाडपडी झाली. यात कोणीही जखमी नाही. शनिवार वाडा येथे तटबंदीवर झाड पडल्याने बांधकाम थोडेसे ढासळले.

शहराच्या वेगवेगळ्या भागात रात्री ८.४५ पर्यंत पडलेला पाऊस (मिलीमीटर)

पुणे ४०.४
लोहगाव ४०.४
तळेगाव ५८.५
हडपसर ५०.५
वडगाव शेरी ४१
राजगुरूनगर ३८
मगरपट्टा ३४
हवेली १८.५