काँग्रेससाठी मशिदींतून फतवे, पुण्यातील हिंदूंनी भाजपला मत द्यावं, राज ठाकरेंची साद

पुणे :‘पुणे लोकसभा मतदारसंघामध्ये काही मुस्लिमबहुल परिसरातून मशिदींमधून काँग्रेसला मतदान करण्याचे फतवे काढले जात आहेत. मुसलमान मतदार सुज्ञ आहे. काँग्रेस त्यांचा वापर करून घेत आहे, हे त्यांनाही कळले आहे; पण मशिदींमधून जर अशा प्रकारचे फतवे काढले जात असतील, तर माझाही पुण्यातील हिंदू समाजासाठी ‘फतवा’ आहे. मोठ्या प्रमाणावर मतदान करून पुण्यात हिंदूंचे ‘मोहोळ’ उठु दे,’ असे सांगत महाराष्ट्र नवनिर्माण सेनेचे अध्यक्ष राज ठाकरे यांनी शुक्रवारी पुण्यातील हिंदू समाजाला भाजपला मतदान करण्याची साद घातली.

पुणे लोकसभा मतदारसंघाचे महायुतीचे उमेदवार मुरलीधर मोहोळ यांच्या प्रचारासाठी शुक्रवारी पुण्यात राज ठाकरे यांच्या सभेचे आयोजन करण्यात आले होते. या वेळी ठाकरे यांनी काँग्रेस आणि राष्ट्रवादी काँग्रेस शरदचंद्र पवार यांचा पक्ष जातीपातीचे गलिच्छ राजकारण करीत असल्याची टीका ठाकरे यांनी केली.

राज्याचे उच्च व तंत्रशिक्षण मंत्री चंद्रकांत पाटील, मुरलीधर मोहोळ, मनसे विद्यार्थी सेनेचे अध्यक्ष अमित ठाकरे, भाजप नेते हर्षवर्धन पाटील, भाजपचे शहराध्यक्ष धीरज घाटे, मनसेचे शहराध्यक्ष साईनाथ बाबर, भाजप प्रदेश उपाध्यक्ष राजेश पांडे, राष्ट्रवादी काँग्रेसचे शहराध्यक्ष दीपक मानकर, शिवसेनेचे शहरप्रमुख नाना भानगिरे, मनसेचे अनिल शिदोरे, किशोर शिंदे, राजेंद्र वागस्कर, रणजित शिरोळे, आशिष देवधर, गणेश भोकरे, राघवेंद्र ऊर्फ बापू मानकर आदी या वेळी उपस्थित होते.
जेल की पक्षबदल, दोनच मार्ग होते, पत्नीलाही गोवल्याने जड अंतःकरणाने निर्णय, नियतीने ही वेळ कुणावर आणू नये, वायकर व्याकुळ
पुण्यातल्या काही राजकारण्यांनी कायम नागरिकांना जातीपातीत विभागण्याचा प्रयत्न केला. त्यातूनच राम गणेश गडकरींचा पुतळा फोडला, जेम्स लेनचे प्रकरण बाहेर काढले. शरद पवारांनी १९९९ साली ‘राष्ट्रवादी’ची स्थापना केली. तेव्हापासून महाराष्ट्रात जातीपातीच्या राजकारणाचे विष कालवले जात असल्याची टीका ठाकरे यांनी केली.
ठाकरे गटाला आणखी एक धक्का; ३४ वर्ष आमदारकी, बाळासाहेबांनी मंत्री केलेल्या नेत्याने साथ सोडली
‘पुण्यासारख्या शहरात शिक्षण चांगले आहे. नोकऱ्याही उपलब्ध आहेत; पण केवळ चांगले वातावरण नाही म्हणून इथले तरुण परदेशात जाण्याचा मार्ग स्वीकारत आहेत,’ अशी खंतही ठाकरे यांनी व्यक्त केली.

‘शहराचे नियोजन करा’

राज ठाकरे यांनी मुरलीधर मोहोळ यांचा प्रचार करताना त्यांना शहराच्या नियोजनावरून काही सूचनाही केल्या. ‘शहर दिवसेंदिवस बकाल होत चालले आहे, त्याच्याकडे लक्ष देण्याची जबाबदारी नगरसेवक, आमदार, खासदार यांची आहे. मुरलीधर मोहोळ तुम्ही निवडून आलात, तर शहराच्या नियोजनाकडे लक्ष द्या, आरोग्य, पाणीपुरवठा, रस्ते, वाहतुकीचे प्रश्न सोडवा,’ अशी सूचनाही ठाकरे यांनी केली.

Read Latest Maharashtra News Updates And Marathi News

अजित पवार जातीपातीत अडकले नाहीत

‘माझे आणि अजित पवार यांचे अनेक वाद असतील; पण मी जाहीरपणे सांगतो, की अजित पवार यांनी शरद पवार यांच्याबरोबर असूनदेखील कधी जातीपातीचे राजकारण केले नाही,’ असे म्हणत ठाकरे यांनी अजित पवार यांचेही कौतुक केले