दाभोलकरांच्या हत्येला नऊ वर्षे उलटल्यानंतर १५ सप्टेंबर २०२१ रोजी पुण्याच्या विशेष न्यायालयाने डॉ. वीरेंद्रसिंह तावडे, शरद कळसकर, सचिन अंदुरे, संजीव पुनाळेकर आणि विक्रम भावे या पाच आरोपींवर आरोप निश्चित केले. या पाचही आरोपींनी गुन्हा कबूल करण्यास नकार दिला. त्यामुळे विशेष न्यायाधीश एस. आर. नावंदर यांच्या न्यायालयात या खटल्याची सुनावणी सुरू झाली. न्यायाधीश नावंदर यांच्या बदलीनंतर आता विशेष न्यायाधीश पी. पी. जाधव यांच्या न्यायालयात या खटल्याची सुनावणी सुरू आहे. या खटल्यात ‘सीबीआय’तर्फे विशेष सरकारी वकील प्रकाश सूर्यवंशी यांनी वीस साक्षीदारांची साक्ष नोंदविली, तर बचाव पक्षातर्फे अॅड. प्रकाश साळशिंगीकर, अॅड. वीरेंद्र इचलकरंजीकर आणि अॅड. सुवर्णा आव्हाड यांनी दोन साक्षीदारांची साक्ष नोंदवित सरकार पक्षाच्या साक्षीदारांची उलटतपासणी नोंदविली. अडीच वर्षे चाललेल्या या खटल्यात आरोपींना शिक्षा होणार की त्यांची निर्दोष मुक्तता होणार, याकडे सर्वांचे लक्ष लागले आहे.
खासदार प्रज्वलविरोधात ‘ब्लू कॉर्नर नोटीस’? सीबीआयची सिद्धरामय्या यांना माहिती
असे आहेत आरोप
डॉ. दाभोलकर हत्या प्रकरणी डॉ. वीरेंद्रसिंह तावडे, शरद कळसकर, सचिन अंदुरे, संजीव पुनाळेकर आणि विक्रम भावे या पाच आरोपींवर आरोप निश्चित करण्यात आले आहेत. तावडे हा गुन्ह्याचा मुख्य सूत्रधार असून, अंदुरे व कळसकर यांनी गोळ्या झाडल्या, तर भावे याने घटनास्थळाची रेकी केली असून, पुनाळेकर यांनी आरोपी कळसकरला गुन्ह्यातील शस्त्र नष्ट करण्याचा सल्ला दिला, असे ‘सीबीआय’ने आरोपपत्रात नमूद केले आहे. त्यामुळे तावडे, अंदुरे, कळसकर आणि भावे यांच्यावर हत्या करणे (कलम ३०२), हत्येचा कट रचणे (कलम १२० बी), अनेक व्यक्तींनी समान हेतूने केलेले कृत्य (कलम ३४), शस्त्रास्त्र कायदा आणि विघातक कारवाया प्रतिबंधक कायद्यातील (यूएपीए) विविध कलमांनुसार आरोप निश्चित करण्यात आले आहेत, तर पुनाळेकर यांच्यावर पुरावे नष्ट केल्याचा आरोप निश्चित करण्यात आला आहे. त्यामध्ये संजीव पुनाळेकर आणि विक्रम भावे हे दोन आरोपी सध्या जामीनावर बाहेर आहेत.
डॉ. नरेंद्र दाभोलकर हत्या प्रकरणाच्या खटल्यात ‘सीबीआय’ने वीस साक्षीदारांची साक्ष नोंदविली आहे, तर बचाव पक्षातर्फे दोन साक्षीदारांची साक्ष आणि एक साक्षीदाराची कागदपत्रे न्यायालयात सादर केली आहेत. दोन्ही बाजूंचा युक्तिवाद पूर्ण झाला असून, आता विशेष न्यायालय अंतिम निकाल देणार आहे.
– अॅड. प्रकाश सूर्यवंशी, विशेष सरकारी वकील, सीबीआय