‘मी पण रडून दाखवतो, ये मला मतदान करा रे’
मी आधीपासून सांगत होतो की काही लोक तुम्हाला भावनिक करतील. आज आमच्या पठ्ठ्याने डोळ्यात पाणी आणून दाखवलंच… पण हा रडीचा डाव झाला… मी पण रडून दाखवतो. ये मला पण मत द्या रे… पण रडारडीचा खेळ करून मतं मागायची असतात का..? तुमचं काम दाखवा ना.. त्यासाठी नाणं खणखणीत पाहिजे, असे म्हणत अजित पवार यांनी रोहित पवार यांच्या रडण्याची मिमिक्री केली.
तुला राजकारणाचे बाळकडू आम्ही पाजले, दादांनी रोहित पवारांना सुनावले
याला जिल्हा परिषदेचे तिकीट मी दिले. शरद पवार साहेब सांगत होते, अजिबात देऊ नको. मी साहेबांचं ऐकलं नाही. मी तिकीट दिलं. त्यानंतर म्हणाला हडपसरला विधानसभा लढवतो. आम्ही म्हणालो, तू कर्जत जामखेडला जा, आम्ही तिथं मदत करु. आम्ही तुला राजकारणाचे बाळकडू पाजले, तुम्ही आमच्यावर टीका करता. तुझ्यापेक्षा नक्कीच चार उन्हाळे पावसाळे जास्त बघितले ना… अशा शब्दात अजित पवार यांनी रोहित पवार यांना सुनावले.
रोहित पवार मंचावर का भावनिक झाले?
अजित पवार यांनी भाजपसोबत जाण्याचा निर्णय घेतला. त्यावेळी आम्ही टीव्हीवर बातम्या पाहत होतो. एक एक नेता त्यांच्याकडे जात होता. त्यादरम्यान साहेबांना मी काही प्रश्न विचारत होतो. साहेब मला त्या प्रश्नांची उत्तरे देत होते. त्यावेळी स्वाभिमानी महाराष्ट्र घडविण्यासाठी जोपर्यंत नवी पिढी घडवत नाही तोपर्यंत मी डोळे मिटणार नाही, असे पवारसाहेबांनी म्हटल्याची भावनिक आठवण रोहित पवार यांनी सांगितली. ही आठवण सांगताना त्यांच्या डोळ्यात अश्रू आले होते. ते हुंदक्यांनी दाटले होते. त्यावेळी मंचावरील कार्यकर्त्यांनी त्यांना शांत केले.