प्रतिनिधी, नाशिक : महापालिकेतील नोकरभरतीला विविध कारणांनी ग्रहण लागल्यामुळे राज्य सरकारच्या मुख्यमंत्री युवा कार्य प्रशिक्षण योजनेमुळे (लाडका भाऊ) रिक्त पदे तात्पुरत्या स्वरूपात भरण्याची संधी उपलब्ध झाली आहे. निवडणुकीच्या तोंडावर राज्य सरकारने राज्यातील तरुण बेरोजगारांसाठी सुरू केलेल्या ‘लाडका भाऊ’ योजनेअंतर्गत स्थानिक स्वराज्य संस्थांना रिक्त पदांच्या पाच टक्के जागा प्रशिक्षणार्थींसाठी भरण्याचा अध्यादेश काढला आहे. त्यामुळे उच्चशिक्षण घेऊनही बेरोजगार तरुणांना महापालिकेतही तांत्रिक व अतांत्रिक पदांवर काम करता येणार आहे. प्रशासन उपायुक्त श्रीकांत पवार यांनी सर्व विभागप्रमुखांची बैठक घेऊन आवश्यक पदांचा तपशील सर्व विभागांकडून मागवला आहे.महापालिकेत सध्या नोकरभरतीअभावी मनुष्यबळाचा तुटवडा आहे. त्यामुळे एकेका कर्मचाऱ्याकडे दोन-तीन विभागांचा पदभार आहे. २०११ च्या जनगणनेनुसार नाशिक शहराची लोकसंख्या १४.९० लाख होती. सध्या ती २२ लाखांवर पोहोचली आहे. दुसरीकडे महापालिकेत निवृत्ती, स्वेच्छानिवृत्तीमुळे पदे रिक्त होत असल्याने महापालिकेवर मनुष्यबळाचा मोठा ताण येत आहे. महापालिकेची स्थापना १९८२ मध्ये झाली असली, तरी अद्याप महापालिकेचा एकत्रित आकृतिबंध मंजूर झालेला नाही. जी पदे मंजूर किंवा कार्यरत आहेत, ती एक तर महासभेच्या ठरावाने किंवा सरकारच्या विविध आदेशांनी मंजूर आहेत. सध्या नाशिक महापालिकेत अ ते ड संवर्गाची ७,७२५ पदे मंजूर आहेत. त्यातही तीन हजार पदे निवृत्ती, स्वेच्छानिवृत्तीमुळे रिक्त असून, सध्या साडेचार हजार कर्मचाऱ्यांवर महापालिकेचा गाडा सुरू आहे. मध्यंतरी अग्निशमन व वैद्यकीय विभागातील ६६१ पदे भरण्यास सरकारने मंजुरी दिली असली, तरी विविध कारणांमुळे ही भरतीदेखील रखडली आहे. दुसरीकडे महापालिकेने सर्व विभागांचा आढावा घेऊन ९,०१६ पदांचा सुधारित आकृतिबंध मंजुरीसाठी सरकारला पाठवला आहे. मात्र, त्याला अद्याप मंजुरी मिळालेली नाही. त्यामुळे नोकरभरती होईपर्यंत महापालिकेने सरकारच्या मुख्यमंत्री युवा कार्य प्रशिक्षण योजनेचा लाभ घेण्याचा निर्णय घेतला आहे. या योजनेचा लाभ घेणाऱ्या तरुणांना महापालिकेतही प्रशिक्षणार्थी म्हणून सहा महिने काम करण्याची संधी दिली जाणार असून, त्या संदर्भातील प्रक्रिया महापालिकेने सुरू केली आहे.
विभागांकडून मागवली माहिती
सध्या जुन्या आकृतिबंधानुसार तीन हजारांपेक्षा अधिक पदे रिक्त असून, त्यातही तांत्रिक संवर्गातील रिक्त पदांची संख्या अधिक आहे. महापालिकेत २००३ नंतर नोकरभरती झालेली नाही. शहराची वाढती लोकसंख्या व आगामी सिंहस्थ कुंभमेळा लक्षात घेता कुशल तांत्रिक मनुष्यबळाची आवश्यकता आहे. त्यासाठी नोकरभरती होणे गरजेचे असले तरी ती होत नसल्याने महापालिकेने सरकारच्या १२ जुलै २०२४ रोजी काढलेल्या अध्यादेशाच्या आधारे रिक्त पाच टक्के पदे तात्पुरत्या स्वरूपात भरण्याची तयारी केली आहे. त्यासाठी महापालिकेतील ३७ विभागांकडून त्यांना आवश्यक असलेल्या मनुष्यबळाची यादी मागवली आहे.
प्रशिक्षणार्थींना मिळणारे मानधन
शैक्षणिक अर्हता – मानधन
बारावी पास- ६,००० रुपये
आयटीआय, पदविका- ८,००० रुपये
पदवीधर, पदव्युत्तर- १०,००० रुपये