काय घडलं?
शाश्वत राम भोंगाडे (वय १५, रा. कुमार कृती सोसायटी, कल्याणीनगर) असे मृत्यू झालेल्या शाळकरी मुलाचे नाव आहे. या प्रकरणी चंद्रशेखर भोंगाडे (वय ५२) यांनी तक्रार दिली आहे. कारचालक रवीकांत रामदीन गौड (वय ३७, रा. रोहन मिथिला, विमाननगर) याला अटक केली आहे.
पोलिसांनी दिलेल्या माहितीनुसार, कल्याणीनगर येथील लेक्सिकॉन इंटरनॅशनल स्कूलमध्ये शाश्वत दहावीत शिकण्यास होता. शाळेपासून अर्धा किलोमीटर अंतरावर कुमार कृती सोसायटीमध्ये तो राहण्यास होता. तो सायकलवरून रोज शाळेत जात होता. शनिवारी सकाळी शाश्वत घरून सायकलवरून शाळेकडे निघाला होता. त्या वेळी कारचालक गौड दाम्पत्य ‘डी-मार्ट’मधून वस्तूंची खरेदी करून कारमधून घरी निघाले होते. मेरी गोल्ड सोसायटी समोरून जात असताना भरधाव कारची शाश्वतच्या सायकलला जोरात धडक बसली. त्याच्या डोक्याला, पोटाला जोराचा मार बसला आणि बेशुद्ध पडला. कारचालकाने त्याला तातडीने कारमधून उपचारासाठी खासगी रुग्णालयात दाखल केले; पण उपचार सुरू असताना शाश्वतचा मृत्यू झाला.
कुटुंबावर दुःखाचा डोंगर…
रुग्णालयाने येरवडा पोलिसांना अपघाताची माहिती दिल्यानंतर कारचालकाला ताब्यात घेतले आहे. त्याच्यावर हयगयीने वाहन चालवून मुलाच्या मृत्यूस कारणीभूत ठरल्याचा गुन्हा दाखल करण्यात आला आहे . शाश्वतच्या अपघाती मृत्यूमुळे भोंगाडे कुटुंबावर दुःखाचा डोंगर कोसळला आहे. त्याच्या पश्चात वडील, आई आणि लहान भाऊ श्री असा त्याचा परिवार आहे .
भरधाव कार चालवून सायकलला धडक देऊन शाळकरी मुलाच्या मृत्यूस कारणीभूत ठरणाऱ्या चालकाला अटक केली आहे. चालकाची वैद्यकीय तपासणी केली असून, त्याने मद्यप्राशन केले नव्हते.- रवींद्र शेळके, वरिष्ठ पोलिस निरीक्षक, येरवडा पोलिस ठाणे