वडिलांचं वर्षापूर्वी निधन
आनवीने गेल्या वर्षी २७ ऑगस्ट रोजी इन्स्टाग्राम पोस्ट शेअर करत वडिलांच्या निधनाची माहिती दिली होती. वडिलांचं तिच्या आयुष्यातील स्थान तिने पोस्टमधून व्यक्त केलं होतं. तिच्या लहानपणाचे हिरो, फूड पार्टनर अशी ओळख तिने करुन दिली होती. वडिलांची तब्येत बरी होती, त्यांचं निधन अचानक आणि अनपेक्षित झालं, पण आता ते माझ्या आजीसोबत असतील, अशा भावना तिने व्यक्त केल्या होत्या. आता आनवीच्या पश्चात तिची शोकाकुल आई आणि धाकटी बहीण असा परिवार आहे.
आनवी कामदारची दोन दिवसांपूर्वीची पोस्ट काय होती?
आनवीने जवळपास सात वर्षांपूर्वीच्या ट्रिपचे फोटो मृत्यूच्या दोन दिवसांपूर्वी इन्स्टाग्रामवर शेअर केले होते. तिने लिहिलं होतं, “मी फक्त २० वर्षांची असताना ती माझी पहिली कोलॅब्रेशन ट्रिप होती! विश्वास ठेवणं जवळजवळ अशक्त होतं. मला आठवतं, की मी माझ्या आई-वडिलांना सांगितले, तेव्हा माझे बाबा खूपच आनंदित झाले होते. कारण लडाख कायमच आमच्या यादीत वरच्या स्थानी होतं. थंड हवामानातील पोशाख खरेदी करण्यासाठी आम्ही झारा शॉपमध्ये गेलो होतो. मी इंटर्नशीप करत असलेल्या ठिकाणी लगेच रजेसाठी अर्ज केला होता.” असं तिने लिहिलं होतं.
फोटो सापडेनात
लाल रंगाची पँट, हिरवं जॅकेट, काळं लेदर जॅकेट, बूट, स्टोल – सगळं बाबांनी घेतलं होतं. मी काही भारी लोकांना भेटले. अर्थात हा अनुभव धडकी भरवणारा होता, कारण त्यापैकी बहुसंख्य टाइम्स ऑफ इंडियाचे पत्रकार किंवा आऊटलूक ट्रॅव्हलर होते. पण ती काय ट्रिप झाली! माझ्याकडे त्या ट्रिपचे फारसे व्हिडिओ नाहीत, कारण मध्यंतरीच्या काळात माझा फोन हरवला. त्यामुळे पाच वर्षांपूर्वीचे फारसे फोटो नाहीत. पण मी वर्डप्रेसवर प्रवासाविषयी ब्लॉग लिहित असल्याने मला काही हाती लागलं. त्यावेळी मी कंटेंटवर फार भर देत नव्हते. त्या क्षणापुरता विचार करत असे, असं आनवीने लिहिलं होतं.
पर्यटनासाठी आनवी रायगड येथील कुंभे धबधब्यावर गेली होती. एका सुळक्यावर रील शूट करत असताना तिचा पाय घसरला. त्यानंतर ती थेट ३५० फूट खोल दरीत कोसळली. खाली पडल्याने गंभीर जखमी झालेल्या आनवीचा श्वास सुरु होता, ती आवाजाला पुसटसा प्रतिसादही देत होती. मात्र माणगाव उपजिल्हा रुग्णालयात उपचार सुरु असताना तिने डोळे मिटले ते कायमचे.