सुषमा अंधारे यांचे ट्विट
” ‘गर्जे’ल तो पडेल काय? #खेला_होबे” असं सूचक ट्वीट ठाकरे गटाच्या सुषमा अंधारे यांनी ‘एक्स’ या सोशल मीडिया अकाऊण्टवर केलं आहे. अजित दादांकडून शिवाजीराव गर्जे, राजेश विटेकर यांना उमेदवारी देण्यात आली आहे. अंधारेंनी ‘गर्जे’ल असा शब्द वापरत त्यात गर्जे या शब्दाला कोट केल्यामुळे त्यांचा रोख शिवाजीराव गर्जे यांच्याकडेच दिसत आहे.
दादांना सहा मतांची गरज
विधान परिषद निवडणुकीत प्रत्येक उमेदवाराला निवडून येण्यासाठी प्रत्येकी २३ मतांचा कोटा निश्चित झालेला आहे. राष्ट्रवादीकडे स्वतःची ४० मतं असून त्यांना दोन उमेदवार विजयी करण्यासाठी आणखी सहा अतिरिक्त मतांची गरज आहे.
पाच मतांची बेगमी
काँग्रेसमधील तीन मतं मिळण्याची अजित पवार गटाला खात्री आहे. तसंच दोन अपक्ष आमदार पाठिंबा देणार असल्याची चर्चाही राष्ट्रवादीच्या गोटात सुरु आहे. म्हणजेच एकूण पाच मतांची बेगमी झाल्याचा राष्ट्रवादीला विश्वास आहे.
अजितदादांचे आमदार, शरद पवारांना मतदान?
दुसरीकडे, शरद पवार गटाने शेकापच्या जयंत पाटील यांना पाठिंबा दिला आहे. मात्र अजितदादांच्या राष्ट्रवादीतील अस्वस्थ आमदार आपल्या उमेदवाराला मतदान करतील, असा विश्वास राष्ट्रवादी काँग्रेस : शरदचंद्र पवार गटाकडून व्यक्त केला जात आहे. त्यामुळे महाविकास आघाडीचे तिन्ही उमेदवार जिंकून दादा गटाला फटका बसण्याची शक्यता वर्तवली जात आहे.
विशेष म्हणजे, ठाकरे गटाकडे पुरेसं संख्याबळ नसतानाही त्यांनी सचिव मिलिंद नार्वेकर यांना रिंगणात उतरवलं आहे. नार्वेकरांची भिस्त काँग्रेसच्या अतिरिक्त मतांवर असल्याने काँग्रेसची मतं राष्ट्रवादीकडे वळली, तर त्याचा फटका ठाकरेंना बसू शकतो. मात्र महाविकास आघाडी मतांची फाटाफूट रोखण्याबाबत कॉन्फिडन्ट आहे.