मुंबईत ढगाळ वातावरण, पुण्याला पावसाचा यलो अलर्ट
मुंबई शहर आणि उपनगरात ढगाळ वातावरण राहिल आणि अधूनमधून हलक्या सरी बरसतील. शहरातील तापमान हे ३१ अंश सेल्सिअस ते २६ अंश सेल्सिअस दरम्यान असेल. तर, पुण्यात मुसळधार पावसाची शक्यता असून येथे पावसाचा यलो अलर्ट देण्यात आला आहे. तसेच, पुढील दोन तीन दिवसात पुण्यात पावसाचा जोर वाढणार असल्याची शक्यता वर्तवली आहे. मराठवाड्यातील छत्रपती संभाजीनगर, जालना, बीड, परभणी आणि धाराशीवमध्ये जोरदार पाऊस पडेल. तर विदर्भातील नागपूर, चंद्रपूर, अमरावती, बुलढाणा, अकोला आणि भंडाऱ्यात विजांच्या कडकडाटासह पावसाची शक्यता वर्तवण्यात आली आहे.
कोकणात मुसळधार पाऊस, कोल्हापुरातही जोरदार सरी बरसणार
तर, उत्तर महाराष्ट्रातील नाशिक, अहमदनगर, नंदुरबारमध्येही पावसाची शक्यता वर्तवण्यात आली आहे. सातारा, सांगली, कोल्हापुरात जोरदार पावसाचा इशारा देण्यात आला आहे. तर, कोकणातही पावसाचा इशारा देण्यात आला आहे. रायगड, रत्नागिरी सिंधुदुर्गात मुसळधार पावासाची शक्यता हवामान विभागाने वर्तवली आहे.
शनिवार-रविवार आणि सोमवारी राज्यात मुसळधार पाऊस कोसळला. मुंबईत सततच्या पावसामुळे सखल भागात तसेच रेल्वे रुळांवर पाणी साचलं होतं. त्यामुळे लोकलसेवा ठप्प पडली होती. त्यामुळे मुंबईकरांना मोठा मनस्ताप सहन करावा लागला होता. तर, राज्यातही अनेक ठिकाणी पूरसदृश स्थिती निर्माण झाली होती. मात्र, त्यानंतर मंगळवारी पावसाने दडी मारली. आजही मुंबईत उन पडलं आहे. तर दिवसभरात शहरासह उपनगरात पाऊस कोसळेल अशी शक्यता वर्तवण्यात आली आहे.