नानासाहेब महाले हे नाशिक मध्ये राष्ट्रवादी राष्ट्रवादी काँग्रेस अजित पवार गटाचे शहराध्यक्ष होते. माजी आमदार नितीन भोसले यांनी यासंदर्भात माहिती दिली. त्यांच्यासह नाशिक मधील असंख्य पदाधिकारी आज सकाळी गोविंद बागेत आले होते. त्यांनी शरद पवारांची भेट घेतली व शरद पवार यांच्या राष्ट्रवादी काँग्रेस शरदचंद्र पवार पक्षात प्रवेश केला.
दरम्यान नाशिक मध्ये नुकतेच झालेल्या लोकसभा निवडणुकीत दिंडोरीचे राष्ट्रवादी काँग्रेस शरदचंद्र पवार पक्षाचे उमेदवार भास्कर भगरे यांनी माजी केंद्रीय मंत्री भारती पवार यांचा मोठ्या मतांनी पराभव केला. राज्यातील नुकत्याच झालेल्या लोकसभा निवडणुकीत शरद पवार यांच्या राष्ट्रवादी काँग्रेस शरदचंद्र पवार पक्षाने मोठे यश मिळवले आहे. शरद पवार यांच्या विषयी सहानभूती व उद्धव ठाकरे यांच्यामुळे महाविकास आघाडीकडे नागरिकांची असलेली सामान्य जनतेची सहानभूती या साऱ्या पार्श्वभूमीवर सध्या राज्यात विधानसभा निवडणुकीच्या पार्श्वभूमीवर मोठ्या प्रमाणावर पक्षांतर घडून येण्याची चिन्हे आहेत.
नाशिक शहरातील राष्ट्रवादी काँग्रेस पक्षाचे (अजित पवार गट) उपाध्यक्ष नाना महाले यांनी १०० पदाधिकाऱ्यांसह आज बारामती मध्ये येऊन शरद पवारांच्या राष्ट्रवादी मध्ये प्रवेश केला. छगन भुजबळ यांची महायुती मध्ये घुसमट होत आहे. अशी टीका यावेळी महाले यांनी केली. दुसऱ्या बाजूला आम्ही आगामी विधानसभा निवडणुकीमध्ये नाशिक मधून दहा ते बारा जागा शरद पवार यांना मागितले असून नक्की तिथे आम्ही निवडून येऊ असा विश्वास नाना महाले यांनी व्यक्त केला.