दुचाकीला धडक देणारी कार पालघरमधील शिंदेसेनेचे उपनेते राजेश शहा यांची आहे. अपघात झाला त्यावेळी शहा, त्यांचा मुलगा मिहीर आणि चालक कारमध्ये होते. कारच्या ड्रायव्हिंग सीटवर मिहीर शहा होता. बीएमडब्ल्यू कारनं वरळीच्या ऍट्रिया मॉलजवळ एका दुचाकीला धडक दिली. या दुचाकीवर एक कोळी दाम्पत्य होतं. ससून डॉकवरुन मासळी खरेदी करुन ते घरी परतत होते. त्यावेळी कारनं त्यांना मागून धडक दिली. दोघेही कारच्या बोनेटवर पडले.
बोनेटवर पडलेल्या पतीनं प्रसंगावधान राखलं आणि बाजूला उडी मारली. त्यात ते जखमी झाले. पण त्यांच्या पत्नीला तशी संधी मिळाली नाही. कार चालकानं पळून जाण्यासाठी वेग वाढवला. त्यानं चार किलोमीटरपर्यंत महिलेला फरफटवत नेलं. कारखाली चिरडल्यानं महिला गंभीर जखमी झाली. तिला नायर रुग्णालयात नेण्यात आलं. पण डॉक्टरांनी तिला मृत घोषित केलं.
या प्रकरणात पोलिसांनी शिंदेसेनेचे उपनेते राजेश शहांना ताब्यात घेतलं आहे. पालघरच्या दिशेनं पळून जात असताना कांदिवली एक्स्प्रेस वेवरुन त्यांना ताब्यात घेण्यात आलं. राजेश शहांचा मुलगा मिहीर आणि त्यांचा चालक, अशा दोघांविरोधात गुन्हा नोंदवण्यात आला आहे. अपघातावेळी मिहीर कार चालवत असल्याचा जबाब जखमीनं दिला आहे. तर राजेश शहांनी मात्र वेगळी माहिती दिली. त्यावेळी चालक कारचं सारथ्य करत होता, असा दावा राजेश शहांनी केला. विशेष म्हणजे पुण्यातील पोर्श कार अपघात प्रकरणानंतर अल्पवयीन मुलाच्या कुटुंबियांनीदेखील आरोपीला वाचवण्यासाठी अशाच प्रकार दावा केला होता.
मोदींचं लीड घटलं, वाराणसीत विश्वासघात; भाजपच्या बैठकीत घमासान, अनेक जण डेंजर झोनमध्ये
बीएमडब्ल्यू कारच्या डाव्या बाजूला विंडशील्डवर शिवसेनेचं चिन्ह आहे. पण अपघातानंतर ते पुसण्याचा प्रयत्न झाल्याचं दिसत आहे. पोलिसांनी राजेश शहांची चौकशी सुरु केली आहे. अपघात झाला तेव्हा तिथे काही मजूर काम करत होते. त्यांचाही जबाब घेण्यात आला आहे. पोलिसांनी अपघातास्थळाच्या परिसरातील ७ सीसीटीव्ही फुटेज गोळा ताब्यात घेतले आहेत. कार ज्या मार्गानं केली, त्या मार्गावरील फुटेजदेखील गोळा केली जात आहेत.