शेवटच्या चाचण्या सुरू
पीएमपीच्या बसचे लाइव्ह लोकेशन दिसणारी यंत्रणा गुगलसोबत विकसित केली जात होती; पण तांत्रिक अडचणीमुळे हे काम पूर्ण झाले नाही. त्यामुळे पीएमपीने प्रवाशांसाठी स्वतः अॅप बनवून त्या माध्यमातून बसची ‘रिअल टाइम’ माहिती देण्याचे काम सुरू केले. या अॅपचे काम पूर्ण झाले असून, त्याच्या शेवटच्या काही चाचण्या सुरू आहेत.
सर्व मार्गांची माहिती
प्रवाशांना अॅपच्या माध्यमातून ज्या बसने जायचे आहे, त्या बसची माहिती घरबसल्या पाहून तिकीट काढता येणार होते. नागरिकांनी घर बसल्या तिकीट काढल्यानंतर प्रवास करताना केवळ वाहकाला ‘क्यूआर कोड’ दाखवताच तिकीट मिळेल. अॅपवर सोशल मीडियाचे सर्व प्लॅटफॉर्म उपलब्ध असतील. पीएमपीच्या सर्व मार्गांची माहितीदेखील यावर मिळणार आहे. बसचे वेळापत्रक आणि पीएमपीचे विविध पास अॅपद्वारे ऑनलाइन काढण्याची सोय आहे. अंतिम चाचण्या झाल्यानंतर येत्या काही दिवसांमध्ये हे अॅप सुरू केले जाणार आहे.
प्रायोगिक तत्त्वावर काम
पीएमपीच्या अॅपबरोबरच आणखी दोन कंपन्यांनादेखील पीएमपीचे ऑनलाइन तिकीट काढण्यासाठीचे काम देण्यात आले आहे. केंद्र सरकारने स्टार्टअपच्या माध्यमातून दिल्लीच्या ‘ॲनामार’ आणि ‘अमिराज’ या दोन कंपन्यांची निवड केली. त्या कंपन्यांना पीएमपीच्या प्रवाशांना ऑनलाइन तिकीट काढून देण्याचे काम दिले आहे. या कंपन्यादेखील त्यांच्या ऑनलाइन प्लॅटफॉर्मवर पीएमपीचे तिकीट, बसचे लाइव्ह ट्रॅकिंग, वेळापत्रक अशी सर्व माहिती देणार आहेत. सध्या या कंपन्या प्रायोगिक तत्त्वावर मोफत काम करीत आहेत. या कंपन्यांकडून ऑनलाइन यंत्रणा विकसित करण्याचे काम पूर्ण होत आहे. या कंपन्यांमुळे पीएमपीच्या प्रवाशांना ऑनलाइन तिकीट काढण्यासाठी तीन पर्याय मिळणार आहेत. त्याचा फायदा प्रवाशांना होणार आहे.
पीएमपीच्या अॅपबरोबरच दोन खासगी कंपन्यांना पीएमपीचे ऑनलाइन तिकीट काढण्याचे काम देण्यात आले आहे. केंद्र सरकारने नेमून दिलेल्या कंपन्यांकडून ऑनलाइन तिकीट आणि बसच्या ‘लाइव्ह ट्रॅकिंग’ची माहिती प्रवाशांना मिळणार आहे. त्यामुळे प्रवाशांना पर्याय मिळणार आहेत.- नितीन नार्वेकर, सहव्यवस्थापकीय संचालक, पीएमपी