मुख्यमंत्र्यांनी सर्व जिल्हाधिकाऱ्यांच्या त्यांच्या त्यांच्या विभागातील धोकादायक पर्यटन स्थळांचा आढावा घेण्याच्या सूचना केल्या आहे. पावसाळी पर्यटनात अशा घटना घडू नये, पर्यटक सुरक्षित राहावे यासाठी सर्व धोकादायक स्थळांवर सूचना फलक लावण्याचे आदेश देण्यात आले आहेत. तसेच, पर्यटन ठिकाणी जीवन रक्षक तैनात करा, कार्डिक रुग्णवाहिका ठेवा, एसडीआरएफची टीम तैनात करा, असे आदेशही मुख्यमंत्र्यांनी दिले आहेत.
इतकंच नाही तर, मुंबई महापालिकेच्या आयुक्तांनाही शिंदेंनी यासंबंधीच्या सूचना केल्या आहेत. मुबईतील समुद्र किनारे सुरक्षित करा, असं त्यांनी सांगितलं. त्यानंतर आता प्रशासन अलर्ट मोडवर असून कामाला लागलं आहे.
पावसाळी पर्यटनाचा आनंद घ्या पण आपल्या प्रियजनांचा जीव धोक्यात घालू नका, धोक्याच्या इशाऱ्याकडे दुर्लक्ष करु नका, असं आवाहन शिंदेंनी नागरिकांना केलं आहे.
रविवारी भुशी डॅमवर काय घडलं?
पुण्यातील अन्सारी परिवारात लग्न होतं. त्यामुळे आग्र्याहून त्यांचे काही नातेवाईक लग्नासाठी आले होते. लग्नसोहळ्यानंतर त्यांनी लोणावळ्यात पावसाळी पर्यटनाला जाण्याची इच्छा व्यक्त केली. त्यामुळे हे १०-१२ जणांचं कुटुंब लोणावळ्यात आलं. ते भुशी डॅमच्या बॅक वॉटरमध्ये पाण्यात भिजण्याचा आनंद घेत असताना अचानक पाण्याची पातळी वाढली आणि ते पाण्यात अडकले. त्यांनी स्वत:ला सांभाळण्याचा प्रयत्न केला पण एक मोठा प्रवाह आला आणि हे सगळे वाहून गेले. त्यापैकी पाच जणांचा मृत्यू झाला असून चौघांचे मृतदेह हाती लागले आहेत. तर एकाचा शोध सुरु आहे.