१. आजपासून नियम बदलले, थेट तुमच्या खिशावर परिणाम
जुलै महिन्याच्या पहिल्याच दिवसापासून देशात अनेक बदल लागू झाले आहेत. बँकिंग, फास्टटॅग सेवा आणि इतर क्षेत्रांशी संबंधित अनेक बदल पाहायला मिळणार आहेत. यापैकी काही नियम डिजिटल वॉलेट, क्रेडिट कार्ड आणि गॅस सिलेंडरशी संबंधित असतील. याचा थेट परिणाम तुमच्या स्वयंपाकघरापासून ते बँक खाते आणि मोबाईल फोनपर्यंत होईल.
२. लग्नासाठी आग्य्राहून आलेल्या कुटुंबाचा भुशी डॅममध्ये अंत
हडपसरच्या सय्यदनगर येथील एकाच कुटुंबातील सात जण भुशी डॅम भागातील धबधब्याच्या प्रवाहात वाहून गेले. यापैकी दोघांना पाण्याच्या प्रवाहातून बाहेर पडता आल्याने ते बचावले. तर चार लहान मुलांसह एक महिला वाहून गेली. यापैकी तिघांचे मृतदेह बचाव पथकाने शोधले असून दोघे बेपत्ता आहेत. या घटनेमुळे अन्सारी कुटुंबावर दुःखाचा डोंगर कोसळला आहे.
३. चार दिवस पावसाचे! नाशकात यलो अलर्ट
ऊन आणि दुष्काळाच्या झळा सोसल्यामुळे नाशिक शहरवासियांची आतुरता वाढीस लावणारा पाऊस जूनच्या शेवटच्या दिवशी दमदार बरसला. सकाळपासून बरसलेल्या पावसामुळे सूर्यदर्शनही नागरिकांना घडू शकले नव्हते. पावसामुळे रस्त्यांवर अनेक ठिकाणी पाण्याची तळी साचली. पुढील चार दिवस पावसाचे असून, सोमवार आणि मंगळवारी हवामान विभागाने नाशिक जिल्ह्याला यलो अलर्ट जारी केला आहे.
४. पुतण्याच्या बालेकिल्ल्यात काकांकडून सुरुंग
लोकसभा निवडणुकीत राष्ट्रवादीला अवघी एक जागा मिळाल्याने उपमुख्यमंत्री अजित पवार यांच्यावर मोठी नामुष्की ओढावली आहे. तर शरद पवार यांनी विधानसभेसाठी डाव टाकायला सुरुवात केली आहे. अजितदादांचा बालेकिल्ला असलेल्या पिंपरी चिंचवडमध्ये शरद पवारांनी भेटीगाठी घेण्यास सुरुवात केली असून दादा गटाचे पिंपरी चिंचवड शहराध्यक्ष अजित गव्हाणे यांच्यासह १६ माजी नगरसेवकांनी शरद पवारांची भेट घेतली. लवकरच त्यांचा शरद पवार गटामध्ये प्रवेश होणार असल्याची माहिती आहे.
५. हजारो पदवीधर पोलीस भरतीच्या मैदानात
बारावी, पदवी आणि पदव्युत्तर शिक्षण पूर्ण केलेल्या हजारो उमेदवारांसह इंजिनिअरिंग आणि फार्मसी या व्यावसायिक पदव्या घेतलेले तरुणही पोलिस भरतीच्या मैदानात उतरलेत. खासगी क्षेत्रातील नोकऱ्यांसह व्यवसायाचे भांडवल शोधण्याऐवजी शारीरिक क्षमता आणि बुद्धिमत्तेच्या जोरावर खाकी वर्दी पटकवण्याचे प्रयत्न उमेदवार करताना दिसत आहेत.
६. समृद्धी लक्झरी बस अपघातास एक वर्ष
समृद्धी महामार्गावर गेल्या वर्षी एक जुलै रोजी लक्झरी बस पेटून झालेल्या अपघातात मृत्युमुखी पडलेल्या २५ प्रवाशांच्या कुटुंबीयांना प्रत्येकी २५ लाख रुपये देण्याची घोषणा मुख्यमंत्री एकनाथ शिंदे यांनी त्यावेळी केली होती. एकूण ६ कोटी २५ लाख रुपयांची मदत या माध्यमातून दिली जाणार होती. मात्र या घटनेस एक वर्ष पूर्ण होत असतानाही मदत मिळालेली नाही
७. एसी काँट्रॅक्टचा आनंद क्षणभंगुर, मुंबईच्या कुटुंबातील तिघांचा मृत्यू
नागपुरात एसीचे मोठे कंत्राट मिळाल्याचा मालाडच्या मन्सुरी कुटुंबाचा आनंद क्षणभंगुर ठरला. कंत्राट मिळवून परत येताना विरुद्ध दिशेने आलेल्या वाहनाच्या चुकीमुळे कुटुंबाच्या गाडीला अपघात झाला. हा अपघात एवढा भयंकर होता, की त्यात तिघांना जागीच प्राण गमवावे लागले. फैय्याझ शकील मन्सुरी, फैझल शकील मन्सुरी व अल्तमेश मन्सुरी असे अपघातात मृत्युमुखी पडलेल्या प्रवाशांची नावे आहेत.
८. बुमराहच्या बेबीसीटरची पोस्ट
आयसीसी टी-२० विश्वचषकात संपूर्ण स्पर्धेत अचूक आणि भेदक मारा करणाऱ्या जसप्रीत बुमराहला मालिकावीर हा पुरस्कार मिळाला. भारताच्या विजयानंतर बुमराह अतिशय भावुक झाला होता. त्याच्या जन्मावेळी नर्सकडून त्याला हातात घेणाऱ्या, त्याचा सांभाळ करण्यात मोलाचा वाटा असलेल्या दीपल त्रिवेदी यांनी ‘एक्स’ सोशल मीडियावर एक पोस्ट शेअर केली आहे. त्यांनी जसप्रीत आणि बुमराह कुटुंबासोबतच्या अनेक आठवणींना उजाळा देत काही फोटोही शेअर केले आहेत.
९. सूर्याने सांगितला ड्रेसिंग रुममधला प्रसंग
भारतीय संघाने टी-२० क्रिकेट वर्ल्ड कप उंचावल्यानंतर रोहित शर्मा, विराट कोहली आणि रवींद्र जाडेजा यांनी लगेचच आंतरराष्ट्रीय टी-२० क्रिकेटमधून निवृत्ती जाहीर केली. वैयक्तिक विक्रमांच्या मोहात न पडता तिघांनी नव्या पिढीसाठी भारतीय संघाचे दार खुले केले. निवृत्तीच्या चर्चा सुरु असताना सूर्यकुमार यादवने ड्रेसिंग रुममधला किस्सा शेअर केला.
१०. बदललेल्या फाईलचं कोडं अखेर उलगडलं
ठरलं तर मग या मालिकेच्या आजच्या भागात चैतन्य फाईलच्या अदलाबदलीबाबत विचारतो, तेव्हा अर्जुन आणि सायली त्याला नक्की काय घडलं याबद्दल सांगतात. प्रिया ऑफिसमधून फाईल चोरुन जाताना अर्जुनने तिला पाहिलेलं असतं. त्यामुळे काहीही झालं तरी प्रियाला गाठून ती फाईल त्यांना ताब्यात घ्यायची असते. प्रिया फारशी लांब गेली नसणार या अंदाजाने ते एक प्लॅन बनवतात. त्यानुसार कॉन्ट्रॅक्ट मॅरेजच्या फाईलसारखी दिसणारी एक फाईल शोधून ते ऑफिसमधून निघतात.