फडणवीसांच्या नावावर फुली- सुषमा अंधारे
उद्धव साहेबांना एका ताटात जरी घेऊन फडणवीस जेवले तरी आम्ही देवेंद्र फडणवीस या नावावर आता फुली मारली आहे. म्हणजे विषय संपला आहे. काहीही असं नाही. योगायोगाने आपल्याकडे लिफ्ट पाच-पन्नास नाही, त्यामुळे एकाच लिफ्ट मधून ते गेले की याचा अर्थ लगेच एकत्र आले असं नाही, असं सुषमा अंधारे म्हणाल्या.
भाजपने विश्वासघाताचे विषारी घोट पाजले – सुषमा अंधारे
चंद्रकांत पाटील आणि त्यांच्या पक्षाने आम्हाला विश्वासघाताचे विषारी घोट पाजले आहेत हे विश्वासघाताचे विषारी घोट सुद्धा पचवून आम्ही परत उभा राहिलो आहे. माध्यमांसमोर जरी चंद्रकांत पाटील यांनी चॉकलेट दिले असले तरी आमची विनंती आहे की जनतेला आश्वासनांचे चॉकलेट देऊ नका, तुमच्या अशा चॉकलेटने आम्ही तुम्हाला जनतेबाबत प्रश्न विचारणार नाही या भ्रमात राहू नका, असंही त्या म्हणाल्या.
विधान भवनात काय घडलं?
विधान भवनात उद्धव ठाकरे आणि देवेंद्र फडणवीस हे एकाच लिफ्टसमोर आले. यावेळी लिफ्टची वाट बघत असताना त्यांच्याच थोडा संवाद झाला. तर लिफ्टमध्येही ते एकत्रच होते, यावेळी त्यांच्यासोबत प्रवीण दरेकर आणि छगन भुजबळही होते. या भेटीने राजकीय वर्तुळात चर्चांना उधाण आलं. मात्र, ही भेट निव्वळ योगायोग असून अनौपचारिक भेट असल्याचं उद्धव ठाकरेंनी स्पष्ट केलं.