खासदार संजय राऊत काय म्हणाले?
मुख्यमंत्रीपदाच्या चेहऱ्याशिवाय निवडणुकीला समोरे जाणे धोक्याचे आहे. महाविकास आघाडीला जे लोकसभेला यश मिळाले ते उद्धव ठाकरे यांच्या नेतृत्वामुळेच मिळाले असं संजय राऊत यांनी सांगितले. बिन चेहऱ्याचे सरकार अजिबात चालणार नाही, असंही ते यावेळी म्हणाले. त्यामुळे मविआने उद्धव ठाकरे यांना मुख्यमंत्रीपदाचा उमेदवार घोषीत करावे, अशी मागणी, संजय राऊत यांनी केली आहे.
काँग्रेस आणि राष्ट्रवादीची प्रतिक्रिया?
संजय राऊत यांच्या या मागणीचे पडसाद लगेचच महाविकास आघाडीत उमटले. राष्ट्रावादी काँग्रेस शरद पवार पक्षाचे प्रदेशाध्यक्ष जयंत पाटील यांनी याबाबात आपली प्रतिक्रिया दिली आहे. ते म्हणाले की, ”महायुतीला हरवणं हे आमचं पहिलं टार्गेट आहे. महायुतीला सत्तेवरुन खाली उतरवू. सत्तेत आल्यानंतर मुख्यमंत्री कोण असेल हे आम्ही बसून ठरवू”, असं जयंत पाटील यांनी स्पष्ट केलं आहे. तर ”मविआची एकत्रित बैठक होईल. या बैठकीत मुख्यमंत्री कोण असणार? हे ठरवलं जाईल”, असं विधानसभा विरोधी पक्षनेते विजय वडेट्टीवार यांनी सांगितलं. त्यामुळे मुख्यमंत्रीपदाचा चेहरा जाहीर करण्याला काँग्रेस राष्ट्रवादीने एक प्रकारे विरोध केला आहे असं म्हणल्यास वावगं ठरणार नाही.
शिवसेनेचे (उद्धव ठाकरे) आमदार काय म्हणाले?
संजय राऊत यांच्या या मागणीनंतर शिवसेनेचे आमदारही आक्रमक झाले आहेत. आमदार वैभव नाईक यांनी उद्धव ठाकरे यांना भावी मुख्यमंत्री म्हटलं आहे. ”त्यांच्याच नेतृत्वाखाली विधानसभा निवडणूका लढवल्या जातील. मुख्यमंत्रीपदाचा चेहरा उद्धव ठाकरे असतील”, असंही नाईक यांनी स्पष्ट केलं. तर विधान परिषदेचे विरोधी पक्षनेते अंबादास दानवे यांनी ”सध्या मुख्यमंत्री कोण हा विषय महत्त्वाचा नाही असं सांगितलं. शिवाय याबाबतचा निर्णय मविआच्या बैठकीत घेतला जाईल”, अशी सावध भूमीका घेतली आहे.