मुंबई: राज्यात सर्वदूर पावसाने हजेरी लावली असून मुंबई, ठाणे, पालघर, पुण्यासह राज्यातील बऱ्याच भागात मुसळधार पाऊस पडतो आहे. आज सकाळपासून मुंबई शहरात पावसाची रिपरिप सुरु आहे. तर, हवामान खात्याच्या अंदाजानुसार, येत्या २४ तासात मौसमी वारे संपूर्ण राज्य व्यापतील. तसेच, पुढील पाच दिवस राज्यात ढगांच्या कडकडाटासह मुसळधार पावसाचा इशारा देण्यात आला आहे. राज्यातील काही जिल्ह्यांना पावसाला ऑरेंज अलर्ट तर काही जिल्ह्यांनी यलो अलर्ट देण्यात आला आहे.पावसाने राज्यात पुन्हा एकदा जोरदार हजेरी लावल्यानंतर गेल्या दोन-तीन दिवसांपासून अनेक जिल्ह्यांमध्ये मुसळधार पाऊस बरसतो आहे. तर पुढील पाच दिवस राज्यात जोरदार पाऊस बरसणार असल्याचा इशारा देण्यात आला आहे.
मुंबईत पुढील तीन-चार तासात धो-धो बरसणार
मुंबईत आज पहाटेपासूनच पावसाच्या रिमझिम सरी कोसळत आहेत. शुक्रवारीही मुंबईसह उपनगरात जोरदार पाऊस झाला. तर आज, पुढील तीन ते चार तासात मुंबईत मुसळधार पावसाचा इशारा हवामान खात्याने दिला आहे.
विदर्भाला पावसाचा ऑरेंज अलर्ट
त्याशिवाय, विदर्भाला पुढील काही दिवस पावसाचा ऑरेंज अलर्ट देण्यात आला आहे. यादरम्यान विदर्भात वादळी वाऱ्यांसह पावसाच्या जोरदार सरी कोसळतील. नागपूर, अमरावती, यवतमाळ, गडचिरोलीमध्ये मुसळधार पावसाचा इशारा आहे. तर, पालघर, ठाणे, रायगड या जिल्ह्यांमध्येही पावसाचा इशारा देण्यात आला आहे. मध्य महाराष्ट्र आणि उत्तर महाराष्ट्रातील काही भागातही आज पाऊस पडेल.
मराठवाड्यातही पावसाची शक्यता
त्याशिवाय, नाशिक, अहमदनगर, धुळे, नंदुरबार, जळगावमध्येही धुवांधार पाऊस होईल. तर मराठवाड्यालाही पावसाचा इशारा देण्यात आला आहे.