शिवसेना लोकसभेच्या सात जागा जिंकली आपण आणखी तीन-चार जिंकलो असतो. पण आपण का हरलो, हे सगळ्यांना माहित आहे. दुधखुळं पोरगंही सांगेल की उबाठा पक्षाला काँग्रेसच्या वोट बँकेने तारले. मुंबईतल्या चार जागा कशामुळे गेल्या हे सांगायचीही गरज नाही. मते देण्यासाठी कुठून फतवे निघाले हे आता सगळ्यांना माहित आहे. काहींना उबाठाच आता आपला मसिहा वाटू लगाला आहे, पण ही मतांची सूज आहे. ती लवकरच उतरेल, अशी टीका शिवसेना पक्षाचे प्रमुख एकनाथ शिंदे यांनी ठाकरे गटावर केली. तर विधानसभेवर महायुतीचा भगवा फडकविण्याचा निर्धार यावेळी त्यांनी वर्धापदिनाच्या निमित्ताने व्यक्त केला.
शिवसेनेच्या ५८ व्या वर्धापनदिनानिमित्त जाहीर मेळाव्याचे आयोजन वरळी येथील एनएससीआय डोममध्ये करण्यात आले होते. यावेळी नवनियुक्त खासदारांचा सत्कार करण्यात आला. यावेळी एकनाथ शिंदे यांनी लोकसभा निवडणुकीत झालेल्या मतदानावरुन ठाकरे गटाला लक्ष्य केले. शिंदे म्हणाले की, आपण ठाकरे गटासमोर १३ जागा लढल्या त्यातील सात जागा आपण जिंकलो. ठाणे, कल्याण, कोकण, संभाजीनगर हे शिवसेनेचे बालेकिल्ले आपण अबाधित राखले, उबाठाला मात्र कोकणात जागा मिळू शकली नाही. राजकीय पंडित सांगत होते की आपल्याला एक किंवा दोन जागा मिळतील पण हा विजय ठासून मिळवला, असे शिंदे म्हणाले.
शिवसेनेचा परंपरागत मतदार धनुष्यबाणासोबतच असल्याचा दावा यावेळी शिंदेंनी केला. ते म्हणाले, शिवसेनेची १९ टक्के मते आहेत, त्यातील १४.५० टक्के मते शिवसेनेला मिळाली तर फक्त ४.५० टक्के मते ठाकरे गटाला मिळाली. ठाकरे गटाच्या जागा फक्त आणि फक्त काँग्रेसमुळे जिंकून आल्या, हेही शिंदेनी अधोरेखित केले. काँग्रेसच्या दावणीला बांधलेली शिवसेना सोडवण्यासाठी, बाळासाहेबांचा विचार जपण्यासाठी दोन वर्षांपूर्व आम्ही उठाव केला, परंतु, बाळासाहेबांचा वारसा सांगणाऱ्यांना यंदाच्या निवडणूकीत काँग्रेसच्या उमेदवाराला मतदान करावे लागले. काँग्रेसला मत देताना उबाठाचा हात कसा थरथरला नाही, असा सवाल शिंदे यांनी विचारला.
आपण केलेल्या उठावावर जनतेने लोकसभा निवडणुकीत शिक्कोमोर्तब केले आहे, आपला निर्णय कसा योग्य होता हे निकालात सिध्द झालेले आहे. मतदारांनी दाखवलेला विश्वासाला एकनाथ शिंदे तडा जाऊ देणार नाही, हा शब्द मी देतो, असेही शिंदे म्हणाले. बाळासाहेब ठाकरे आपल्या सभेला संबोधित करताना हिंदू बांधवानो आणि भगिनींनो अशी सुरूवात करायचे पण बाळासाहेबांचा वारसा सांगणाऱ्यांना हिंदुत्वाची इतकी अलर्जी झाली आहे, की त्यांना हिंदू म्हणून घ्यायची लाज वाजते.
शिवाजी पार्कच्या इंडी बैठकीत त्यांनी जनतेला देशभक्तांनो असे संबोधित केले. आताच्याच भाषणातही त्यांनी हे धाडस केले नाही. हे कसले हिंदुत्व आहे. उबाठा उमेदवारांच्या प्रचारात पाकिस्तानचे झेंडे नाचत होते, हिरवे झेंडे भगव्यावर मारले जात होते, तरीही हे गप्प, मतांसाठी इतकी कसली लाचारी, असा सवाल शिंदे यांनी केला.
वरळीत आदित्य ठाकरे यांच्या मतदारसंघात उबाठा गटाचे मताधिक्य कमी झाले यावर टीका करताना शिंदे यांनी मतदारसंघात नाही पत आणि माझे नाव गणपत, असा टोला लगावला. कोकण, ठाणे, कल्याण, पालघर, संभाजीनगर येथून उबाठा साफ झाले आहेत. वर्धापनदिन साजार करण्याचा अधिकार केवळ आपलाच, त्यांनी आता दुसरे काहीतरी नाव ठेवावे, त्यांच्या पक्षाचे नाव उठाबसा संघटना असे ठेवले पाहिजे, अशी टीकाही शिंदे यांनी केली.
उबाठाला रडे गट नाव द्या सारखाच रडीचा डाव
उत्तर-पश्चिम लोकसभा मतदारसंघातील अमोल कीर्तीकर विरुध्द रवींद्र वायकर यांच्या लढतीविषयीही शिंदे यांनी भाष्य केले. वायकरांचा विजय उबाठांच्या जिव्हारी लागला आहे. त्यांच्या विजय हा मेरिटवर झाला असून हा जनतेचा विजय असल्याचे शिंदे म्हणाले. विजय झाला की ईव्हीएम चांगला, पराभव झाला की ईव्हीएम वाईट. सारखाच रडीचा डाव खेळणाऱ्या या पक्षाला रडे गट नाव द्यायला हवे, असा टोला शिंदे यांनी लगावला.
Uddhav Thackeray : पराभव जिव्हारी लागला आहे, पण त्याचा बदला मी जरुर घेणार – उद्धव ठाकरे
आम्ही अल्पसंख्याक समाजाच्या विरोधात नाही
आमचे कितीतरी कार्यकर्ते अल्पसंख्याक आहेत, आम्ही देशभक्त मुस्लिमांच्या विरोधात नाही. सर्व सामाजला सोबत घेऊन विकास करण्याचा आमचा अजेंडा आहे. परंतु, निवडणुकीत अल्पसंख्याक, दलित वर्गात खोटा प्रचार करुन आमच्या विरोधात मतदान झाले. हे पुन्हा होणार नाही, अशी ग्वाही शिंदे यांनी दिली.
विधानसभेच्या कामाला लागा
विधानसभेच्या कामाला लागण्याच्या सूचना देताना शिंदे म्हणाले की, दर आठवड्याला दहा कुटुंबांना भेट द्या, त्यांच्या समस्या ऐकून घ्या. जनतेच्या कायम संपर्कात राहा. नेता किंवा कार्यकर्ता लोकांच्या दारात शोभून दिसतो. वर्क फ्रॉम होम नाही तर होम टू होम जायचे आहे, असे शिंदे म्हणाले. मतदारयादीत नावे शोधा ती पुन्हा नोंदवा. विशिष्ट ठिकाणी मताचा टक्का वाढतोय आणि आपला टक्का कमी होतोय, त्याकडे लक्ष द्या आणि मतदार वाढवा, अशी सूचना त्यांनी केली.
आपण बेसावध राहिलो
लोकसभेप्रमाणे गाफील न राहता काम करण्याचे शिंदे यांनी कार्यकर्त्यांना सांगितले. आपण बेसावध राहिलो, आपण जिंकणारच आहोत या भ्रमात राहिलो. परंतु, आता झाले ते झाले, आपण कुठे चुकलो याचे आत्मपरिक्षण करा. दोन वर्षांताली सरकारची कामे जनतेपर्यंत पोहोचवा, तरच तर विधानसभेत यश मिळवू शकतो. पुढच्या पाच वर्षांत विकासाला बुलेटचे इंजिन लागल्याशिवाय राहणार नाही. विधानभवनावर पुन्हा एकदा महायुतीचा भगवा झेंडा फडकविण्याचा निर्धार व्यक्त करत शिंदे यांनी ग्रामसभा ते विधानसभा, असा नारा दिला.