चिमुकला खेळताना शिकाऊ कारचालकाने अचानक गाडी वळवली, एकुलता एक लेक गेला, कुटुंबावर शोककळा

दीपक पडकर, इंदापूर : मागील अनेक दिवसांपासून अपघात तसंच हिट अँड रनच्या घटनांमध्ये मोठ्या प्रमाणात वाढ झाली आहे. पुण्यातील पोर्श कार प्रकरण, जळगावातील अपघात प्रकरण तसंच नागपुरात झालेला दुचाकीचा अपघात अशा अनेक घटना एकामागे एक होताना दिसत आहेत. यातच आणखी एका चिमुकल्याचा अपघातात मृत्यू झाल्याची दुर्दैवी घटना घडली आहे. नवशिक्या वाहनचालकाच्या धडकेत शाळकरी मुलाचा अपघात झाला आहे. या अपघातात तो गंभीर जखमी झाला असून त्याला उपचारासाठी हडपसरमधील खासगी रुग्णालयात हलवण्यात आलं. मात्र उपचार सुरू असताना आज बुधवारी १९ जून रोजी त्याचा मृत्यू झाला. ही दुर्घटना इंदापूर तालुक्यातील भिगवण येथे मंगळवारी १८ जून रोजी घडली.
MJPJAY News : मोफत आरोग्य विम्याबाबत मोठी बातमी, पांढऱ्या रेशन कार्डधारकांनाही मोफत मिळणार ५ लाखांपर्यंतचे उपचार

१० वर्षीय मुलाचा अपघातात मृत्यू

समर्थ सुशील शिंदे (वय १०, रा. भिगवण, ता. इंदापूर, जि. पुणे) असे मृत्यूमुखी पडलेल्या मुलाचे नाव आहे. या प्रकरणी गुन्हा दाखल करण्याची प्रक्रिया सुरू असल्याची माहिती पोलिसांनी दिली आहे. कृषी उत्पन्न बाजार समितीच्या मैदानात चारचाकी वाहन चालवण्यास शिकणाऱ्याने अचानक वाहन वळवल्याने सायकल खेळत असल्याच्या मुलाचा गाडीखाली सापडून मृत्यू झाला.
Nagpur News: नागपूरात हिट अँड रनचं सत्र सुरूच; दुचाकीची आईसह चिमुकल्यांना धडक, मायेच्या डोळ्यादेखत मुलीचा करुण अंत

कार शिकणाऱ्याने गाडी अचानक वळवली आणि…

मंगळवारी सायंकाळच्या वेळी एकजण चारचाकी गाडी शिकत होता. मैदानात गाडी चालवत असताना अचानक त्याने गाडी वळवली आणि त्याचवेळी सायकल खेळत असलेला समर्थ गाडीच्या पुढच्या आणि मागच्या चाकाखाली एकाच वेळी सापडला. या घटनेत समर्थ गंभीर जखमी झाला, त्याला तातडीने रुग्णालयात उपचारासाठी हलवण्यात आलं. मात्र, उपचारादरम्यान आज त्याचा मृत्यू झाला.

समर्थ शिंदे हा आदर्श विद्या मंदिर या शाळेत इयत्ता चौथीच्या वर्गात शिकत होता. सुशील शिंदे यांचा हा एकुलता एक मुलगा होता. गुणी आणि मनमिळावू असणारा मुलगा अचानक गमावल्याने, त्याच्या या अकाली निधनाने भिगवण परिसरात हळहळ व्यक्त करण्यात येत आहे. एकुलता एक लेक गमावल्याने शिंदे कुटुंबावर दु:खाचा डोंगर कोसळला आहे. या अपघातप्रकरणी पुढील तपास भिगवण पोलीस करत आहेत.