नवी इंटरलॉकिंग यंत्रणा कार्यान्वित
रेल्वे मंडळाच्या ‘सिग्नल अॅन्ड टेलिकॉम’ विभागाने सन २०२१मधील परिपत्रकानुसार, नवी इंटरलॉकिंग यंत्रणा कार्यान्वित झाल्यावर क्रॉसओव्हरवरील २५० मीटरच्या नियमांची अंमलबजावणी सक्तीची करण्यात आली होती. नियमाच्या सक्तीमुळे सीएसएमटी ते कसारा, कर्जत मार्गावरील लोकलसह मेल-एक्स्प्रेस प्रचंड विलंबाने धावत होत्या. याबाबत सर्वप्रथम ‘महाराष्ट्र टाइम्स’ने वृत्त दिले होते.
नेमकं काय झालं होतं?
‘सीएसएमटी’तील इंटरलॉकिंगमधील नव्या नियमांमुळे मेल-एक्स्प्रेसच्या वाहतुकीला अतिरिक्त वेळ लागत होता. मेल-एक्स्प्रेस आणि मुख्य मार्गावरील जलद लोकल एकाच रुळांवरून धावत असल्याने जलद लोकल फेऱ्यांवरही त्याचा परिणाम झाला होता. नव्या नियमातून सूट मिळून जुन्या नियमांप्रमाणे रेल्वे वाहतूक करण्याची विनंती मध्य रेल्वेने केली होती. ती रेल्वे मंडळाने विशेष बाब म्हणून मान्य केली आहे. यामुळे अतिशय वर्दळीच्या ‘सीएसएमटी’मधील गाड्यांची हाताळणी जलद होईल आणि वक्तशीरपणात सुधारणा होईल, असे मध्य रेल्वेचे मुख्य जनसंपर्क अधिकारी डॉ. स्वप्नील निला यांनी सांगितले.
सीएसएमटीमध्ये नवी इंटरलॉकिंग यंत्रणा २ जूनपासून कार्यान्वित झाली. त्यासाठी ३६ तास सीएसएमटी ते भायखळा आणि वडाळा रोड लोकल वाहतूक बंद करण्यात आली होती. ब्लॉकनंतर रेल्वेगाड्या सुरू झाल्या, मात्र मेल-एक्स्प्रेस आणि मुख्य मार्गावरील लोकल सुमारे अर्धा-पाऊण तास विलंबाने धावत होत्या. यामुळे नोकरदारांचे प्रचंड हाल झाले होते.