आपण प्रत्येकजण आपल्या त्वचेची खूप काळजी घेत असतो. यासाठी आपण महागड्या स्किन केअर प्रोडक्टचा वापर करत असतो. तर काही जण हे घरगुती उपायांचा अवलंब करत असतात. यामध्ये त्वचेची काळजी घेताना एसपीएफ घटक असलेल्या क्रिमचा वापर मोठ्या प्रमाणात केला जातो. जास्त करून या प्रकारचे क्रिम म्हणजेच सनस्क्रीन उन्हात बाहेर जाताना लावणे त्वचेसाठी महत्वाचे ठरते. कारण सूर्याच्या अतिनील किरणांपासून बचाव करण्यासाठी सनस्क्रीन लावली जाते. यासोबतच ते लावल्याने त्वचा चमकदार होण्यास आणि हायड्रेट राहण्यास मदत होते.
सनस्क्रीन हे मुलांसाठी तसेच प्रौढांसाठी देखील आवश्यक मानले जाते. आजकाल बाजारात मुलांसाठीही एसपीएफ क्रीम उपलब्ध आहे. त्यांनाही ते लावणे आवश्यक मानले जाते. पण लहान मुलांसाठी सनस्क्रीन लावणे योग्य आहे की नाही? चला जाणून घेऊया तज्ञांकडून याबद्दल.
तज्ञांचे मत
दिल्लीतील श्री बालाजी अ‍ॅक्शन मेडिकल इन्स्टिट्यूटचे वरिष्ठ सल्लागार, त्वचारोगतज्ज्ञ डॉ. विजय सिंघल सांगतात की, मुलांनीही सनस्क्रीन लावावे, विशेषतः जेव्हा ते जास्त वेळ उन्हात असतात. मुलांची त्वचा खूप नाजूक असते आणि सूर्याच्या हानिकारक अल्ट्राव्हायोलेट किरणांमुळे त्यांच्या त्वचेचे लवकर नुकसान होऊ शकते. सहा महिन्यांपेक्षा मोठ्या मुलांसाठी सनस्क्रीन सुरक्षित मानले जाते, परंतु सहा महिन्यांपेक्षा लहान मुलांना सूर्यापासून दूर ठेवावे.
जेव्हा जेव्हा तुमची मुलं बाहेर खेळायला किंवा फिरायला जातात तेव्हा त्यांच्या त्वचेवर किमान SPF 30 असलेले ब्रॉड-स्पेक्ट्रम सनस्क्रीन लावा जे UVA आणि UVB यादोन्ही किरणांपासून मुलांच्या त्वचेचे संरक्षण करेल. सनस्क्रीन लावण्यापूर्वी ती मुलांच्या त्वचेसाठी सुरक्षित आहे की नाही हे आधी पाहा आणि त्यात ऑक्सिबेन्झोनसारखे हानिकारक केमिकल तर नाहीत ना याची खात्री करा. झिंक ऑक्साईड किंवा टायटॅनियम डायऑक्साइड असलेले खनिज-आधारित सनस्क्रीन मुलांसाठी चांगले मानले जातात. सनस्क्रीन लावल्यानंतर 15 ते 20 मिनिटांनी मुलांना उन्हात बाहेर जाऊ द्या आणि दर 2 ते 3 तासांनी किंवा पाण्यात खेळल्यानंतर पुन्हा सनस्क्रीन लावा.
याशिवाय, मुलांना उन्हापासून वाचवण्यासाठी टोपी, सनग्लासेस आणि हलके पूर्ण बाह्यांचे कपडे घाला. त्याचबरोबर मुलांना शाळेतून परत आणताना, उन्हापासून वाचवण्यासाठी तुम्ही छत्री वापरू शकता. सकाळी 10 ते दुपारी 4 वाजेपर्यंत मुलांना अनावश्यकपणे घराबाहेर जाऊ देऊ नका किंवा तीव्र सूर्यप्रकाशात खेळू देऊ नका, कारण यावेळी सूर्याची अतिनील किरणे सर्वात तीव्र असतात. याचा त्वचेवर तसेच आरोग्यावर वाईट परिणाम होऊ शकतो. जर मुलांना त्वचेची ॲलर्जी किंवा रॅशेज येत असतील तर प्रथम हातावर सनस्क्रीनची पॅच टेस्ट करा किंवा डॉक्टरांचा सल्ला घेऊन त्यांच्यासाठी योग्य ती क्रिम घ्या.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)