निवडणुकीसाठी अधिकृत रणनीती ठरवणार
महाविकास आघाडीतील सर्व प्रमुख नेत्यांनी शनिवारी मुंबईत पत्रकार परिषद घेत विधानसभेसाठी रणशिंग फुंकले. महाविकास आघाडीतील सर्व घटक पक्षांना एकत्र घेऊन ही निवडणूक लढविण्यात येणार असल्याचे यावेळी जाहीर करण्यात आले. या पत्रकार परिषदेपूर्वी आघाडीतील सर्व प्रमुख नेत्यांची एक बैठकही पार पडली. या बैठकीत निवडणुकीच्या रणनीतीबाबत साधकबाधक चर्चा झाल्याची माहिती पुढे आली आहे. निवडणुकीसाठी अधिकृत रणनीती ठरविण्यात येणार असून जागावाटपही लवकरात लवकर निश्चित करण्याचे ध्येय आघाडीतील नेते मंडळींनी ठेवले आहे. जागावाटप करताना उमेदवारांच्या जिंकण्याची क्षमता हेच प्रमुख धोरण असावे, असा एक सूर जवळपास सर्वच नेते मंडळींनी या बैठकीत आळवला, अशी माहिती पुढे आली आहे.
एकच संयुक्त जाहीरनामा करण्याबाबत एकमत
मुख्य म्हणजे, राज्यात महाविकास आघाडीचे सरकार असतानाच समान किमान कार्यक्रमाची अंमलबजावणी करण्यात आली होती. त्या दृष्टिकोनातून काही निर्णय घेण्यात येतील का, अशी चर्चा असतानाच महाविकास आघाडीकडून आगामी विधानसभा निवडणुकीसाठी एकच संयुक्त जाहीरनामा करण्याबाबत एकमत झाल्याची माहिती समोर आली. याबाबत लवकरच पुढील निर्णय जाहीर करण्यात येणार असून सर्वसमावेशक असा हा जाहीरनामा असेल, अशी माहिती या बड्या नेत्याकडून देण्यात आली. सर्व घटकांना न्याय देण्यासाठी आम्ही यानिमित्त काम करणार असल्याचेही त्यांनी नमूद केले. लवकरच या जाहीरनाम्यासाठी एक समिती स्थापन करण्यात येणार असून त्यात जवळपास सर्वच पक्षांतील सदस्यांना स्थान देण्यात येणार आहे, असे समजते. दरम्यान, पत्रकार परिषदेपूर्वी झालेल्या या बैठकीतील ही चर्चा प्राथमिक स्वरूपाची असली, तरी त्याबाबत लवकरच अंतिम निर्णय घेण्यात येणार आहे. त्यानंतरच त्याची अधिकृत घोषणा केली जाईल, असे सांगण्यात आले.
Sudhir Mungantiwar : उद्धव ठाकरे आदित्य यांच्या लग्नाची पत्रिका घेऊन आले तर…सुधीर मुनगंटीवार यांचं मिश्कील उत्तर
Read Latest Maharashtra News Updates And Marathi News
विविध समित्या स्थापन करणार
संयुक्त जाहीरनाम्यासह निवडणुकीसाठी रणनीती निश्चित करताना सर्व पक्षांतील प्रमुख नेत्यांचा समावेश असलेल्या इतरही अनेक समित्या जाहीर करण्याची शक्यता आहे. यामध्ये प्रामुख्याने प्रचार समिती, जाहिरात समिती, समन्वय समिती आणि इतर समित्या असतील.