“या दुर्दैवी घटनेकडे कोणत्या दृष्टीकोनातून पाहिले जात आहे हे महत्त्वाचे नाही, हा एक अपघात होता आणि जी व्यक्ती वाहन चालवत होती ती अल्पवयीन होती,” असं या नातेवाईकाच्या याचिकेत म्हटले आहे.
“सीएलएल (child in conflict with law) अंतर्गत अत्यंत बेकायदेशीर आणि मनमानी कोठडीतून अल्पवयीनला ताबडतोब मुक्त करा” आणि दंडाधिकारी आणि बाल न्याय मंडळाचे “बेकायदेशीर” रिमांडचे आदेश रद्द करण्याची विनंती या याचिकेत करण्यात आलेली आहे.
सरकारी वकील हितेन वेणेगावकर यांनी सांगितले की, न्यायालयाच्या आदेशानुसार अल्पवयीन व्यक्तीला ताब्यात घेण्यात आले असल्याने हॅबियस कॉर्पसची रिट कायम ठेवता येत नाही. तसेच, तो तुरुंगात नसून निरीक्षण केंद्रात आहे आणि त्यामुळे त्याची तात्काळ सुटका करण्याचा प्रश्नच उद्द्भवत नाही. त्याच्या तत्काळ सुटकेसाठी वकील आबाद पोंडा यांनी युक्तिवाद केला. या सुनावणीवर न्यायमूर्ती भारती डांगरे आणि मंजुषा देशपांडे म्हणाल्या की, अल्पवयीन २१ मे पासून निरीक्षण गृहात असल्याने अंतरिम आदेश देण्याची गरज नाही. ते २० जून रोजी या याचिकेवर विचार करतील.
पुणे पोर्शे कार अपघात, दोघांचा मृत्यू
पुण्याच्या कल्याणीनगर भागात १९ मे रोजी पहाटे साडे तीन वाजण्याच्या सुमारास बिल्डर विशाल अगरवालच्या अल्पवयीन मुलाने आपल्या आलीशान पोर्शे कारने दोघांना उडवलं यामध्ये दोघांचाही मृत्यू झाला. अल्पवयीन हा गाडी चालवाना मद्यप्राशन केलेला होता. तसेच, त्याने भरधाव वेगाने गाडी चालवत या दोघांना धडक दिली. याप्रकणात अल्पवयीन मुलाला बाल निरीक्षण गृहात पाठवण्यात आलं आहे. तर, त्याचे वडील विशाल अगरवाल, आई शिवानी अगरवाल आणि आजोबा सुरेंद्र कुमार अगरवाल तुरुंगात आहेत.
इतकंच नाही तर, लेकाला वाचवण्यासाठी त्याच्या रक्ताच्या नमुन्यांचीही फेरफार करण्यात आली होती. याप्रकरणात ससून रुग्णालयातील दोन डॉक्टरांसह तिघांना पोलिसांनी अटक केली आहे. या प्रकरणात तपास सुरु आहे.