परीक्षेत मेरिटमध्ये येण्यासाठी थोडे मार्क कमी मिळाले म्हणून काही जण चेहरे पाडतात. पण जे नेहमी नापास होतात त्यांना दोन मार्क अधिक मिळाले म्हणून ते हत्तीवरुन साखर वाटतात. त्यामुळे कार्यकर्त्यांनी मनात कोणत्याही प्रकारचा किंतु परंतु ठेवू नका. आपल्यात क्षमता आहे. लोकसभा निवडणुकीत जी मते मिळाली ती कायम ठेवून केवळ एक टक्का मते वाढविली तर आगामी विधानसभा निवडणुकीत आपण क्लीन स्वीप मारु, असा निर्धार व विश्वास राज्याचे उपमुख्यमंत्री देवेंद्र फडणवीस यांनी शुक्रवारी मुंबईतील महाराष्ट्र प्रदेशच्या पदाधिकारी मेळाव्यात व्यक्त केला. त्याचवेळी आता आगामी निवडणुकींसाठी कामाला लागण्याचे आवाहनही फडणवीस यांनी कार्यकर्त्यांना केले. दरम्यान, पंतप्रधान पदी नरेंद्र मोदी हे तिसऱ्यांदा विराजमान झाल्याबद्दल त्यांच्या अभिनंदनाचा ठराव शुक्रवारी महाराष्ट्र प्रदेश भाजपकडून मंजूर करण्यात आला.
आगामी लोकसभा निवडणुकीच्या पार्श्वभूमीवर महाराष्ट्र प्रदेश भाजपची प्रदेश बैठक शुक्रवारी मुंबईतील वसंतस्मृती येथे आयोजित करण्यात आली होती. त्यावेळी वरील निर्धार व्यक्त केला. यावेळी महाराष्ट्र भाजपचे प्रदेशाध्यक्ष चंद्रशेखर बावनकुळे, राष्ट्रीय सरचिटणीस विनोद तावडे, केंद्रीय मंत्री पियुष गोयल, सुधीर मुनगंटीवार यांच्यासह राज्यातील नवनियुक्त खासदार आणि इतर सर्व पदाधिकारी यावेळी उपस्थित होते. यावेळी राज्यातील नवनियुक्त खासदार आणि केंद्रीय मंत्र्यांचा सत्कार यावेळी करण्यात आला.
लोकसभा निवडणुकीच्या निकालाबाबत बोलताना यावेळी देवेंद्र फडणवीस म्हणाले की, निवडणुकांचे फक्त विश्लेषण करुन चालत नाही. रणनिती सुद्धा आखायला लागते. त्यासाठी प्रामाणिक आत्मपरीक्षण करावे लागते, असे मत त्यांनी यावेळी अधोरेखित केले. तर मुंबईच्या कार्यकर्त्यांनी मनावर घेतले तर विजयाचा नवीन संकल्प आपल्याला पहायला मिळेल, असा विश्वासही त्यांनी यावेळी व्यक्त केला. लोकसभा निवडणुकीचा निकाल लक्षात घेता आभाळ कोसळलेले नाही. आपल्याला राज्यात केवळ दोन लाख मते कमी पडली आहेत. तर मुंबईत भाजपला दोन लाख मते अधिक मिळाली आहेत. जवळपास १३० विधानसभा मतदारसंघात आपली आघाडी असल्याचे दिसून आले आहे. प्रचंड ध्रुवीकरण झाल्यानेच आपली संख्या कमी झाली असल्याचे त्यांनी यावेळी नमूद केले. पहिल्या तीन टप्प्यात त्याची तीव्रता अधिक होती. त्यामुळे २४ पैकी केवळ ४ जागा मिळाल्या. नंतर या नरेटिव्हला खोडून काढण्यासाठी आपण प्रतिवाद केला आणि पुढच्या २४ जागांपैकी १३ जागा मिळाल्याचे फडणवीसांनी सांगितले.
Tirumala Tirupati: तिरुपती मंदिर हिंदूंच्या हातात राहणार, तिरुमला येथे फक्त ‘जय गोविंदा’चा जयघोष; चंद्राबाबू नायडूंची मोठी घोषणा
नरेटिव्ह खोडून काढा
दरम्यान, संविधान बदलणार असा नरेटिव्ह लोकांसमोर नेण्यात आला. पण आता हा नरेटिव्ह आपल्याला खोडून काढयला हवा, असे आदेश फडणवीस यांनी यावेळी उपस्थितांना दिले. तर आता आणखीन एक नरेटिव्ह सध्या सेट करण्यात येत आहे. तो म्हणजे महाराष्ट्राला निधी कमी मिळत असल्याचा, खरे तर आधी महाराष्ट्राला ५.१ टक्के निधी मिळायचा, आता ६.३ टक्के मिळतो. निधीबाबतचे निकष वित्त आयोग ठरवितो, असे त्यांनी यावेळी स्पष्ट केले. तर सध्या वक्फ बोर्ड, बीडीडी चाळ आणि स्मार्ट मीटर लावण्याबाबतचा नरेटिव्ह आणला जात आहे. पण प्रत्यक्षात तसा कोणताही निर्णय झालेला नाही.
विनोद तावडे यांनी बोलणे टाळले
भारतीय जनता पक्षाचे राष्ट्रीय सरचिटणीस विनोद तावडे हेदेखील आजच्या बैठकीला उपस्थित होते. मात्र त्यांनी भाषण करणे टाळल्याचे समजते. निवडणुकीच्या निकालाच्या पार्श्वभूमीवर कार्यकर्त्यांचे अनुभव ऐकावे व नेत्यांनी बोलण्यापेक्षा कार्यकर्त्यांनीच अधिक बोलावे व नेत्यांनी ऐकावे, असे पक्षाच्या शिर्षस्थ नेतृत्वाचे संकेत असल्यानेच त्यांनी हे बोलणे टाळल्याचे बोलले जाते.
मतदारसंघनिहाय अहवाल तयार करणार
विधानसभा निवडणुकांसाठी विरोधकांचा नरेटिव्ह खोडून काढण्याचा निर्णय भाजपने घेतला आहे. त्यासाठी भाजप नेते राज्यभर फिरणार आहेत. विशेषतः ४८ लोकसभा मतदारसंघांसाठी निरीक्षकांची नेमणूक करण्यात आली आहे. भाजपच्या मतदारसंघातील पराभवाची नेमकी कारणे शोधली जाणार असून त्याबाबतचा अहवालही तयार केला जाणार आहे. शिवाय, मराठा समाजाचे प्राबल्य असलेल्या मतदारसंघात जाऊन लोकांची मतेही जाणून घ्या, कुणीही गाफील राहू नका, विरोधकांना कमी समजू नका असे आवाहनही भाजपच्या वरिष्ठ नेत्यांनी पदाधिकाऱ्यांना दिले आहेत.
अमित शहा यांचा लवकरच दौरा
भाजपच्या महाराष्ट्र प्रदेश संघटनेत मोठे बदल संभवित असून त्याबाबत लवकरच पक्षाचे ज्येष्ठ नेते व देशाचे गृहमंत्री हे महाराष्ट्राच्या दौऱ्यावर येणार असून ते पक्षातील विविध घटकांशी चर्चा करून पक्षात आवश्यक ते बदल करणार असल्याचेही बोलले जाते.