आईने आणि बहिणीने लेकाला संपवलं, नंतर पुरावा नष्ट करण्याचा प्रयत्न; पोलीस तपासात धक्कादायक समोर

नेमकं काय घडलं?

आई आणि बहिणीसोबत मृत तरुण मयूर माळी याची वारंवार भांडणं होत होती. भांडणादरम्यान मृत तरुण आई आणि बहिणीला शिवीगाळ करून मारहाण करत होता. वादानंतर मयूर दोघींना शिवीगाळ करुन लाधाबुक्यांनी मारहाण करत होता. सततच्या मारहाणीने आई सौ. संगिता आणि बहीण काजल या दोघींचाही मृत तरुणावर राग होता. यानंतर त्यांनी त्याचा काटा काढण्याचं ठरवलं.

दोघींनी मयूरला संपवण्याचं ठरवलं. मयूरला गाढ झोप यावी यासाठी त्याच्या बहिणीने काजलने पाण्याच्या बाटलीत जायफळची पावडर टाकून ती बॉटल ठेवली होती. त्या दोघी उठल्यानंतर त्यांनी मयूरला आवाज दिला असता तो उठला नाही. तो गाढझोपेत असल्याचं लक्षात येताच त्याची आई संगीताने मुलाच्या डोक्यात दगड घालून त्याची हत्या केली. ही हत्या कोणाच्याही लक्षात येऊ नये यासाठी त्याची आई आणि बहिणीने मिळून त्याच्या अंगावर कपडे टाकून त्यावर कापूर टाकून तो पेटवून दिला.

जखमी मयूर माळी याला ग्रामीण रुग्णालयात उपचाराकरता दाखल केल्यानंतर पोलिसांनी मृत तरुणाच्या शरीराचं बारकाईने अवलोकन केलं. त्यावेळी त्याचं शरीर भाजलेलं होतं. तसंच डोक्यात कपाळाच्या वरील बाजूस केसामध्ये सुमारे दीड इंच लाबीची आणि एक सेमी खोल असलेली जखम दिसली. तसंच तरुणाचा डावा कान तुटलेला दिसला आणि डाव्या डोळयाच्या भुवईवर जखम दिसली. त्याच्या नाकामधून आणि ओठामधून थोडासा फेस आल्याचंही दिसलं. मयताच्या शरीरावर आढळून आलेल्या जखमांमुळे पोलिसांची शंका बळावली.

मयूर ज्या ठिकाणी मृत अवस्थेत दिसला, तिथे रक्तमिश्रीत पाणी आढळून आलं. तसंच शेजारीच एक हातात मावेल इतका दगड तसंच थोड्या अंतरावर दुसरा एक मोठा दगड, त्यावर रक्ताचे डाग दिसले. त्या ठिकाणची आणखी पाहणी करुन घटनास्थळी पंचनामा केला आणि माय-लेकीची कसून चौकशी केली. या चौकशीत दोघींनी मयूरला ठार केल्याचं कबूल केलं. मयुरची हत्या केल्यानंतर तर कोणाला समजू नये म्हणून त्याला पेटवून देत खोटी माहिती देत हत्या करुन पुरावा नष्ट करण्याचा प्रयत्न केला आहे, अशी माहिती पोलीस निरीक्षक सोमनाथ वाघ यांनी दिली. याप्रकरणी मयुर याची आई सौ. संगिता रामचंद्र माळी आणि त्याची बहीण काजल रामचंद्र माळी यांना अटक करण्यात आली आहे.