Maharashtra Breaking News LIVE 15 April 2025 : दीनानाथ मंगेशकर रुग्णालयाला थकीत कराबाबत नोटीस

पुण्यातील दीनानाथ मंगेशकर रुग्णालयात गर्भवती महिला तनिषा सुशांत भिसे यांच्या मृत्यूप्रकरणी आज ससून रुग्णालयाचा अहवाल पुणे पोलिसांना मिळणार आहे. या प्रकरणात दीनानाथ रुग्णालय प्रशासनावर हलगर्जीपणा केल्याचा आरोप आहे. यापूर्वी आलेल्या दोन्ही अहवालात रुग्णालयावर ठपका ठेवण्यात आला होता .राज्य मंत्रिमंडळाची आज बैठक होणार असून त्यातही तनिषा भिसे यांच्या मृत्यू प्रकरणात आलेल्या दोन अहवालांवर चर्चा होणार आहे. याप्रकरणी भाजप आमदार अमित गोरखे आज मुख्यमंत्री देवेंद्र फडणवीसांना भेटणार आहेत. डॉ. घैसास यांच्यावर गुन्हा दाखल करण्याची त्यांची मागणी आहे. तर दुसरीकडे तुळजापुर ड्रग्ज तस्करी प्रकरणात तब्बल दोन महिन्यानंतर आज कोर्टात आरोपपत्र दाखल करण्याची शक्यता आहे. ड्रग्ज प्रकरणात एकूण 35 आरोपी निष्पन्न झाले असून यातील 14 आरोपींना गजाआड करण्यात पोलिसांना यश आलं आहे. यासह राज्यातल्या, देशभरातल्या सामाजिक, राजकीय, क्रीडा व इतर विषयातील महत्वाच्या बातम्या व अपडेट्स जाणून घेण्यासाठी दिवसभर हा ब्लॉग फॉलो करत रहा…