गेल्या दोन लोकसभा निवडणुकांपासून शहरातील नाशिक पूर्व, नाशिक पश्चिम, नाशिक मध्य या तीन शहरी आणि देवळाली या अर्धशहरी मतदारसंघातील मताधिक्यामुळे गोडसेंचा विजय सुकर होत होता. यंदा मात्र निकालातून शहरी मतदारांनी गोडसेंची साथ सोडल्याचे चित्र आहे. त्यात भाजपसाठी गेल्या दोन विधानसभा निवडणुकांसाठी गड बनलेल्या व आमदार देवयानी फरांदे यांच्या नाशिक मध्य मतदारसंघाचाही समावेश आहे.
मराठा, ओबीसी, दलित आणि अल्ससंख्याक समाज असे सामाजिक समीकरण या मतदारसंघात आहे. या मतदारसंघात सर्वाधिक झोपडपट्ट्या असून, उच्चभ्रू-मध्यमवर्गीय, दलित अल्पसंख्याक समाजाचा बोलबाला आहे. भाजपसाठी हा मतदारसंघ पूरक नसतानाही आमदार देवयानी फरांदे यांनी सामाजिक समीकरण साधत गेल्या दोन विधानसभा मतदारसंघापासून त्याला भाजपचा गड बनवला आहे. परंतु, लोकसभा निवडणुकीत भाजपकडून अल्पसंख्याक समाजाला टार्गेट केल्याने आणि ‘चारशे पार’चा नारा दिल्यामुळे अल्पसंख्याक आणि दलित मतदार भाजपपासून दुरावल्याचे चित्र आहे.
प्रथमच लोकसभा मतदारसंघात या ठिकाणी महायुतीला पिछाडीवर जावे लागले आहे. गेल्या लोकसभेवेळी गोडसेंना या मतदारसंघातून ९४ हजार ४१९ मते मिळाली होती. यंदा मात्र त्यांच्या मताधिक्यात १० हजारांनी घट होऊन ८४ हजार ९०६ पर्यंत मते घसरली आहेत. दुसरीकडे राजाभाऊ वाजेंना यंदा ८८ हजार ७१२ मते मिळाली आहेत. गोडसेंवर त्यांनी चार हजार मतांची अल्पशी आघाडी घेतल्याने आगामी विधानसभा निवडणुकीत भाजपला हा गड राखण्यासाठी तारेवरची कसरत करावी लागणार असल्याचे चित्र आहे.
भाजपला धोक्याचा इशारा
काँग्रेस सत्तेत आल्यास त्यांच्याकडून अल्पसंख्याक समाजाला १५ टक्के बजेट दिले जाईल, असा हल्लाबोल पंतप्रधान नरेंद्र मोदींनी पिंपळगाव येथील सभेत केला होता. यासह अनेक बाबींमुळे अल्पसंख्याक समाज व मागासवर्गीय समाज भाजपपासून दुरावला होता. अल्पसंख्याक बहुल ६१ मतदान केंद्रांवर ६५ टक्के मतदान झाले होते. त्यामुळे या भागातील अल्पसंख्याक आणि मागासवर्गीय मतदारांनी यंदा महाविकास आघाडीला एकगठ्ठा मतदान केल्याचा मोठा फटका गोडसेंना बसल्याचे चित्र आहे. त्यामुळे ही स्थिती विधानसभेपर्यंत कायम राहिली तर भाजपला हा मतदारसंघ राखणे अवघड होईल, असे चित्र आहे.
मविआ-महायुतीत रस्सीखेच
या विधानसभा मतदारसंघात वाजेंना चार हजारांची आघाडी मिळाल्यानंतर मविआकडून इच्छुक असलेल्यांना आमदारकीचे धुमारे आतापासूनच फुटू लागले आहेत. माजी आमदार वसंत गिते उबाठाकडून या मतदारसंघात तयारी करत आहेत. तर गेल्या वेळी काँग्रेसच्या प्रवक्त्या डॉ. हेमलता पाटील यांनी चांगली लढत दिल्यामुळे काँग्रेसला हा मतदारसंघ हवा आहे. दुसरीकडे महायुतीतील अजित पवार गटाकडून रंजन ठाकरेंचाही या मतदारसंघावर डोळा आहे. त्यामुळे या मतदारसंघावरून महाविकास आघाडी आणि महायुतीतच रस्सीखेच होणार असल्याचे चित्र आहे.
Kolhapur : मंडलिकांच्या पराभवाने घाटगे-मुश्रीफ गटात ठिणग्या, कुणाचे बंटी पाटलांवरुन चिमटे, कुणाकडून ‘राजे’ कनेक्शनवर बोटRead Latest Maharashtra News Updates And Marathi News
मतदारसंघनिहाय मिळालेली मते…
विधानसभा हेमंत गोडसे (२०१९ ची मते) राजाभाऊ वाजे
नाशिक मध्य ८४९०६ (९४४१९) ८८७१२