त्यामुळे पात्र विद्यार्थ्यांच्या संख्येत वाढ झाली आहे. पात्र विद्यार्थ्यांमध्ये सर्वाधिक एक लाख ६५ हजार ४७ विद्यार्थी उत्तर प्रदेशातील आहेत. त्या खालोखाल महाराष्ट्रातून एक लाख ४२ हजार ६६५ विद्यार्थी पात्र ठरले आहेत. पात्र होणाऱ्या विद्यार्थ्यांमध्ये मुलींची संख्या सर्वाधिक सात लाख ६९ हजार २२२ आहे. मुलांची संख्या पाच लाख ४७ हजार ३६ आहे. त्यामुळे इथेही नीटच्या निकालातही मुली समोर असल्याचे चित्र आहे. विद्यार्थ्यांना त्यांचे गुण वेबसाइटहून पाहता येत आहेत.
मराठीतून परीक्षा देण्याकडे पाठ
गेल्या काही वर्षांपासून नीट परीक्षा मराठीसह प्रादेशिक भाषांमध्ये घेण्यात येते. या परीक्षेसाठी मराठीतून परीक्षा देणाऱ्यांच्या संख्येत सातत्चाने घट होत आहे. यंदा ही परीक्षा केवळ एक हजार ७५९ विद्यार्थ्यांनी दिली. गेल्या वर्षी ही संख्या एक हजार ८३३ होती. २०१९ मध्ये ही संख्या ३१ हजार २३९ होती. त्यामुळे या संख्येत सातत्याने घट होत आहे. त्या तुलनेत हिंदी भाषेतून नीट देणाऱ्यांची संख्या वाढती असून, यंदा तीन लाख ५७ हजार ९०८ विद्यार्थ्यांनी हिंदीतून परीक्षा दिली आहे.
ग्रेस गुणांमुळे एनटीएच्या कार्यशैलीवर प्रश्नचिन्ह
एनटीएने परीक्षेचे आयोजन केले होते. मात्र, परीक्षा आयोजनातील आणि प्रश्नपत्रिकेतील त्रुटींमुळे विद्यार्थ्यांचा वेळ वाया गेला. त्यामुळे विद्यार्थ्यांना कमी गुण मिळाल्याच्य़ा तक्रारी पालकांकडून करण्यात आल्या होत्या. याबाबत न्यायालयातही याचिका दाखल करण्यात आल्या. या पार्श्वभूमीवर विद्यार्थ्यांना ग्रेस गुण म्हणून गुणांमध्ये वाढ करून देण्यात आली आहे. अशाप्रकारे काही विद्यार्थ्यांना ७१७ किंवा ७१८ गुण मिळाले असून, अनेक विद्यार्थ्यांच्या गुणांमध्ये वाढ झाली आहे. मात्र, परीक्षेत निगेटिव्ह मार्किंग असल्याने, विद्यार्थ्याला ७१७ किंवा ७१८ गुण मिळू शकत नाही. त्यामुळे नीट परीक्षेत ग्रेस गुण देण्याच्या संपूर्ण प्रकाराला विरोध होत आहेत.
नीट परीक्षेच्या गुण पद्धतीवर आक्षेप
नीट परीक्षेच्या निकालात ‘डीपर’ची सराव परीक्षा दिलेल्या नांदेडच्या नेहा माने हीला ७२० पैकी ७२० गुण मिळाले आहेत. सराव परीक्षा दिलेल्या अनेक विद्यार्थ्यांना ७०० पेक्षा अधिक गुण मिळाल्याने, यशाची परंपरा कायम ठेवली आहे. नीट परीक्षेत एका प्रश्नाच्या बरोबर उत्तराला ४ गुण (एकूण प्रश्न १८०) आहेत. या परीक्षेत निगेटीव्ह मार्किंग असल्याने, एका प्रश्नाचे उत्तर चुकल्यास पाच गुण कमी होतात. या तत्वानुसार विद्यार्थ्याला ७१५ किंवा ७२० गुण मिळणे अपेक्षित होते. मात्र, एनटीएने ग्रेस गुणांच्या नावाखाली अशा विद्यार्थ्यांना ७१७, ७१८ अशा प्रकारे गुण दिले आहे. याचा फायदा अनेक विद्यार्थ्यांना झाला आहे. अशा पद्धतीने चुकीचे गुण देता येत नाहीत. त्यामुळे यंदा राज्यातील सरकारी कॉलेजात एमबीबीएससाठी प्रवेश हवा असल्यास, ६३० गुणांपेक्षा अधिक गुण आवश्यक आहे, असे ‘डीपर’चे संस्थापक हरीश बुटले यांनी सांगितले.
२४,०६,०७९
‘नीट’साठी नोंदणी केलेले विद्यार्थी
२३, ३३,२९७
परीक्षा दिलेले
१३,१६,२६८
वैद्यकीय अभ्यासक्रमांसाठी पात्र ठरलेले विद्यार्थी