प्रतिनिधी, मुंबई : लोकसभा निवडणुकीत झालेल्या निराशाजनक पराभवाबरोबरच बारामतीमध्ये झालेला पराभव राष्ट्रवादी काँग्रेसचे नेते अजित पवार यांच्या जिव्हारी लागल्याचे कळते. बुधवारी नवी दिल्ली येथे होणाऱ्या राष्ट्रीय लोकशाही आघाडीच्या (एनडीए) बैठकीला अजित पवार यांनी हजेरी लावली नाही. दरम्यान, निवडणुकीतील पराभवाची कारणमीमांसा करण्यासाठी आज गुरुवारी पक्षाचे खासदार, आमदार यांच्यासह प्रमुख नेत्यांची बैठक बोलावली आहे. ही बैठक वादळी ठरण्याची शक्यता असून, महायुतीतील घटक पक्षांनी मदत न केल्याने राष्ट्रवादीच्या नेत्यांमध्ये रोष असल्याचेही दिसत आहे.लोकसभा निवडणुकीत राष्ट्रवादीने चार जागा लढवल्या आणि परभणीची जागा राष्ट्रीय समाज पक्षाच्या महादेव जानकर यांना सोडली होती. प्रदेशाध्यक्ष सुनील तटकरे यांना रायगड मतदारसंघात विजय मिळवता आला. परंतु, अन्य उमेदवारांचा पराभव झाला. पक्षाने बारामतीमध्ये राष्ट्रीय अध्यक्ष अजित पवार यांची पत्नी सुनेत्रा पवार यांनाच निवडणुकीच्या रिंगणात उतरवले होते. त्या जिंकून याव्यात, यासाठी स्वतः अजित पवार मतदारसंघात तळ ठोकून होते. पक्षातील सर्व नेत्यांनी बारामतीमध्ये शक्ती पणाला लावली होती. तरीही सुनेत्रा पवार यांचा मतदारसंघात एक लाखाहून अधिक मताधिक्याने पराभव झाला.
बुधवारी सकाळी अजित पवार यांनी रायगडचे विजयी उमेदवार आणि राज्याचे प्रदेशाध्यक्ष सुनील तटकरे यांची भेट घेतली. मात्र त्यानंतर त्यांनी कुणालाही भेट दिली नाही. बारामतीच्या लढतीत अजित पवार यांनी परिश्रमाची पराकाष्ठा केली होती, मात्र त्यात यश न मिळाल्याने ते काहीसे नाराज असल्याचे पक्षातील एका नेत्याने नाव न छापण्याच्या अटीवर सांगितले. बारामतीनंतर पवार यांनी शिरुरमधील उमेदवार शिवाजीराव आढळराव-पाटील यांच्या विजयासाठीही शर्थीचे प्रयत्न केले. मात्र तेथेही लाखभराहून अधिक फरकाने पराभव पदरी पडला.
बुधवारी सकाळी अजित पवार यांनी रायगडचे विजयी उमेदवार आणि राज्याचे प्रदेशाध्यक्ष सुनील तटकरे यांची भेट घेतली. मात्र त्यानंतर त्यांनी कुणालाही भेट दिली नाही. बारामतीच्या लढतीत अजित पवार यांनी परिश्रमाची पराकाष्ठा केली होती, मात्र त्यात यश न मिळाल्याने ते काहीसे नाराज असल्याचे पक्षातील एका नेत्याने नाव न छापण्याच्या अटीवर सांगितले. बारामतीनंतर पवार यांनी शिरुरमधील उमेदवार शिवाजीराव आढळराव-पाटील यांच्या विजयासाठीही शर्थीचे प्रयत्न केले. मात्र तेथेही लाखभराहून अधिक फरकाने पराभव पदरी पडला.
परिणामी, बुधवारी दिल्लीत बोलावण्यात आलेल्या एनडीएच्या बैठकीला न जाणे पवार यांनी पसंत केले. पक्षाचे राष्ट्रीय कार्याध्यक्ष प्रफुल पटेल आणि खासदार सुनील तटकरे या बैठकीला हजर होते.
– पराभवावर होणार मंथन
– बैठक वादळी ठरण्याची शक्यता
– दिल्लीतील एनडीएच्या बैठकीलाही दांडी
मित्रपक्षांनी मदत न केल्याबद्दल नाराजी
निवडणुकीतील निराशाजनक कामगिरीवर मंथन करण्यासाठी उद्या, शुक्रवारी पक्षातील सर्व महत्त्वाचे नेते, खासदार आणि आमदार यांची बैठक बोलावण्यात आली आहे. निवडणुकीत महायुतीकडून मदत न झाल्याबद्दल नाराजी व्यक्त होत असताना ही बैठक वादळी ठरण्याची शक्यता आहे. प्रफुल पटेल यांच्या राजीनाम्याने रिक्त झालेल्या राज्यसभा जागेची आगामी निवडणूक, विधान परिषद निवडणूक आणि काही महिन्यांत लागणारी विधानसभा निवडणूक याविषयीही या बैठकीत चर्चा होऊन रणनीती ठरणार आहे.