काय आहे प्रकरण?
सहायक पोलिस आयुक्त म्हणून निवृत्त झालेले मधुकर थावळ यांनी नरेश राजवानी यांच्या विरोधात भादंविच्या कलम ५०० अन्वये मानहानीची तक्रार दाखल केली आहे. त्या तक्रारीची शहानिशा केल्यानंतर, कुर्ला येथील अतिरिक्त मुख्य न्यायदंडाधिकारी न्यायालयाने २७ फेब्रुवारी २०१९ रोजी राजवानी यांच्याविरोधात प्रोसेस (कायदेशीर कार्यवाही) जारी केले होते. त्याविरोधात राजवानी यांनी सत्र न्यायालयात पुनर्विलोकन अर्ज केला होता. मात्र, अतिरिक्त सत्र न्यायाधीशांनी सुनावणीअंती ९ डिसेंबर २०२२ रोजी तो फेटाळला. त्यानंतर राजवानींनी मागील वर्षी उच्च न्यायालयात रिट याचिका केली होती. न्यायमूर्ती निजामुद्दीन जमादार यांनी अंतिम सुनावणीअंती ती याचिका नुकतीच फेटाळली.
थावळ हे चेंबूर पोलिस ठाण्यात पोलिस उपनिरीक्षक म्हणून कार्यरत असताना, त्यांची राजवानी यांच्याशी ओळख झाली होती. थावळ यांच्यासह त्यांच्या पत्नीने व भावाने राजवानी यांच्या सोबत दुकानांचे गाळे खरेदी करण्याचे व्यवहार केले होते. त्यात काही वाद निर्माण झाल्यानंतर, राजवानी यांनी आपल्याविरोधात खोट्या तक्रारी सुरू केल्याचा थावळ यांचा आरोप आहे. थावळ यांनी बेहिशोबी मालमत्ता जमवल्याची तक्रार राजवानी यांनी भ्रष्टाचार प्रतिबंधक विभागाकडे (एसीबी) केली होती. तसेच त्यांची चौकशी होण्याकरिता उच्च न्यायालयात रिट याचिकाही केली होती. मात्र, एसीबीने चौकशीअंती आरोपात तथ्य नसल्याचे म्हटले आणि उच्च न्यायालयानेही याचिका फेटाळली. तरीही राजवानी यांनी १८ मे २०१८ रोजी रात्री ८.३०च्या सुमारास थावळ यांच्या दुकानासमोर येऊन लोकांसमक्ष आक्षेपार्ह भाषा वापरल्याचा आरोप आहे. ‘तू एसीबीमधून सुटलास, तरी तू चीटर आहेस, लाचखोर आहेस’, अशी जाहीर शेरेबाजी राजवानी यांनी केली. त्यामुळे थावळ यांनी त्यांच्याविरोधात मानहानीची तक्रार दाखल केली आहे.
‘ती निव्वळ शिवीगाळ नाही’
‘एखाद्याच्या प्रतिष्ठेला धक्का पोहोचवण्याचा हेतू नसताना निव्वळ शिवीगाळ असेल, तर तो मानहानीचा प्रकार होत नाही. या प्रकरणात याचिकाकर्त्याने निव्वळ शिवीगाळ केली. त्यामुळे कनिष्ठ न्यायालयांच्या आदेशांत चूक झाली आहे’, असा युक्तिवाद राजवानी यांच्या तर्फे अॅड. अभिनव चंद्रचूड यांनी मांडला. तर दोन्ही कनिष्ठ न्यायालयांचे आदेश हे कायदेशीरदृष्ट्या योग्यच असल्याचा युक्तिवाद सरकारी वकील गीता मुळेकर यांनी मांडला. ‘एसीबी व उच्च न्यायालयातही अपयश आलेले असताना पुन्हा तसेच जाहीर आरोप करणे, यातून माझ्या प्रतिष्ठेला धक्का पोहोचवण्याचा राजवानी यांचा हेतू स्पष्ट होतो’, असा युक्तिवाद थावळ यांनी अॅड. सुशांत जाधवर यांच्यामार्फत केला. तो न्यायमूर्तींनी ग्राह्य धरला. ‘ती निव्वळ शिवीगाळ नाही. प्रथमदर्शनी प्रतिष्ठेला धक्का पोचवण्याचा हेतू दिसतो’, असे निरीक्षण न्यायमूर्तींनी आपल्या आदेशात नोंदवले.