वन खात्याच्या पथकाने मागील आठवड्यात गुरुवारी या प्राणीसंग्रहालयातून एक मऊ कवच असलेले कासव, दोन अर्जेंटाइन ब्लॅक अँड व्हाइट सरडे, एक अजगर (बॉल पायथन) एक आफ्रिकन अजगर आणि एक सामान्य स्नॅपिंग कासव ताब्यात घेतले आहे. परवानगीशिवाय ठेवण्यात आलेले हे प्राणी कसे मिळाले याची कागदपत्रे आणि तपशील प्राणीसंग्रहालय मालकाकडून मागितले आहेत, अशी माहिती वन अधिकारी राकेश भोईर यांनी दिली आहे.
मऊ कवच असलेल्या कासवांना वन्यजीव संरक्षण कायद्यांतर्गत संरक्षण दिले जाते, तसेच वन्यजीव संरक्षण कायद्यातील दुरुस्तीनंतर आता विदेशी प्रजातींनाही संरक्षण मिळाले आहे, ही बाब लक्षात घेऊन प्राणीसंग्रहालयावर कारवाई केली जाऊ शकते. संग्रहालय मालकाला हे प्राणी प्राणी कसे मिळाले, त्यांनी ते डिलरकडून मिळवले की आयात केले याची कागदपत्रे मालकाला द्यावी लागतील, असे या वन अधिकाऱ्याने सांगितले. याबात विचारणा करण्यासाठी प्राणीसंग्रहालयाचे मालक नंदकुमार मोघे यांच्याशी संपर्क करण्याचा प्रयत्न केला असता होऊ शकला नाही.
वन्यजीव विभागाकडून अहवाल
‘हे प्राणीसंग्रहालय बेकायदा चालवले जात असून त्यास कोणतीही मान्यता नाही. प्राणी अतिशय वाईट अवस्थेत ठेवले जातात, तसेच त्यांच्या मृत्यूचे प्रमाण अधिक आहे. प्राणीसंग्रहालयातून अनेक प्राणी चोरीला गेले आहेत. या प्राणीसंग्रहालयाला सीझेडएची मान्यता नाही. या प्रकरणी आम्ही मुख्य वन्यजीव विभागाकडून अहवाल मागवला असून तो लवकरच मिळणे अपेक्षित आहे’, असे मनेका गांधी यांनी म्हटले आहे.
वन्यजीव कायद्यानुसार तपासणी
‘प्राणीसंग्रहालयात ठेवलेले प्राणी वन्यजीव संरक्षण कायद्यानुसार सूचीबद्ध आहेत की नाही, हे तपासावे लागेल. प्राणी चांगल्या स्थितीत ठेवले आहेत की नाही हे पाहण्याची जबाबदारी प्राणीकल्याण मंडळाची आहे’, असे सीझेडएचे सदस्य सचिव डॉ. संजय कुमार शुक्ला यांनी स्पष्ट केले. या प्रकरणी पाठपुरावा करणारे मनसेचे नेते संदीप देशपांडे यांनी आम्ही या प्राणीसंग्रहालयावर कारवाई करण्याची वारंवार मागणी केली. वनखात्याने थातूरमातूर कारवाई केली. आता तरी मोठी कारवाई होईल असे अपेक्षित आहे, असे सांगितले.