मुंबईमध्ये २ जून रोजी सकाळी ८ वाजेपर्यंत कुलाबा येथे केवळ ३.६ तर सांताक्रूझ येथे २२.३१ मिलीमीटर पावसाची वार्षिक नोंद झालेली आहे. १ जूनपासूनची सरासरी पाहता कुलाबा येथे ११.७ मिलीमीटर तर सांताक्रूझ येथे १३ मिलीमीटर पाऊस कमी नोंदला गेला आहे. मार्च ते मे या उन्हाळ्याच्या काळातील नोंदीनुसार मेच्या दुसऱ्या आठवड्यातील एक दिवस पडलेल्या पावसामुळे मुंबई उपनगरांमधील पाऊस हा उन्हाळ्याच्या काळातील सरासरीपेक्षा अतिरिक्त नोंदला गेला आहे, तर कुलाबा येथे मात्र पावसाची तूट नोंदली गेली आहे.
२९ मे रोजी संपलेल्या आठवड्यात मुंबई शहर, उपनगर तसेच पालघर, ठाणे आणि रायगड जिल्ह्यातही पावसाची १०० टक्के तूट नोंदली गेली आहे. मुंबईमध्ये सर्वसाधारणपणे जूनच्या पहिल्या आठवड्यात मेघगर्जनेसह पावसाची उपस्थिती लागते, अशी माहिती प्रादेशिक हवामान विभाग अधिकारी सुषमा नायर यांनी दिली. यंदा उन्हाळ्याच्या काळात सरासरीपेक्षा कमी पाऊस नोंदला गेला आहे. मात्र, येत्या आठवड्यात मान्सूनपूर्व सरींची मुंबईत शक्यता आहे, अशी चिन्हे दिसत असल्याचे त्यांनी सांगितले.
रविवारीही मुंबईमध्ये उष्ण आणि आर्द्रतायुक्त वातावरणामुळे मुंबईकरांना अस्वस्थता जाणवली. मुंबईच्या दोन्ही केंद्रांवर कमाल तापमान ३५ अंशांपेक्षा अधिक नोंदले गेले. कुलाबा येथे ३५.२ तर सांताक्रूझ येथे ३५.४ अंश सेल्सिअस कमाल तापमानाची नोंद झाली. हे तापमान सरासरीपेक्षा अनुक्रमे १.१ आणि १.५ अंशांनी अधिक होते. मुंबईच्या किमान तापमानाचा पाराही सरासरीपेक्षा अधिक आहे. कुलाबा येथे २८.५, तर सांताक्रूझ येथे २९.६ अंश सेल्सिअस किमान तापमान होते. सांताक्रूझचे किमान तापमान सरासरीपेक्षा १.९ अंशांनी अधिक होते.
वातावरणात दिवसभरात ६० टक्क्यांच्या आसपास आर्द्रता होती. ठाणे आणि पालघर जिल्ह्यांना सोमवारीही उष्ण आणि आर्द्रतायुक्त वातावरणाचा इशारा देण्यात आला आहे. मुंबईत कोरड्या हवेचा अंदाज आहे. रायगड आणि रत्नागिरी जिल्ह्यांमध्ये सोमवारपासून हलक्या पावसाला सुरुवात होईल. सिंधुदुर्गात सोमवारपासून मेघगर्जनेचा यलो अॅलर्ट देण्यात आला आहे. तर रत्नागिरीमध्ये मंगळवारपासून यलो अॅलर्ट आहे.
Sansad Bhavan : संसद सुरक्षा यंत्रणेत विचित्र अस्वस्थता, PSS कर्मचाऱ्यांना नोकरीची चिंताRead Latest Maharashtra News Updates And Marathi News
मध्य महाराष्ट्रात बहुतांश जिल्ह्यांना ‘यलो अॅलर्ट’
उत्तर मध्य महाराष्ट्राचा काही भाग वगळता मध्य महाराष्ट्रातील उर्वरित सगळ्या जिल्ह्यांमध्ये मेघगर्जनेसह पावसाचा इशारा भारतीय हवामान विभागाने दिला आहे. अहिल्यादेवी नगर, पुणे, कोल्हापूर, सातारा, सांगली, सोलापूर या जिल्ह्यांमध्ये सोमवारपासून सुरू होणाऱ्या आठवड्यामध्ये पाचही दिवस मेघगर्जनेसह पावसाची शक्यता वर्तवण्यात आली आहे. मराठवाड्यात लातूर, धाराशीव या दोन जिल्ह्यांमध्येही सोमवारपासून मेघगर्जनेसह पावसाची शक्यता आहे. उर्वरित जिल्ह्यांमध्ये हलक्या सरी पडू शकतील.