Pune News : करिअरला मिळणार नवा आयाम, स्वयम पोर्टलद्वारे घरबसल्या शिकता येणार १७५हून अधिक विषय

प्रतिनिधी, पुणे : कला, वाणिज्य, विज्ञान शाखेचे शिक्षण घेता घेता त्यातील काही विशिष्ट विषयांमध्ये ‘स्पेशलायझेशन’ करण्याची संधी विद्यार्थ्यांना घरबसल्या मिळणार आहे. या शाखांमधील १७५हून अधिक विषय ऑनलाइन पद्धतीने शिकण्याची संधी केंद्र सरकारच्या ‘स्वयम पोर्टल’द्वारे उपलब्ध करण्यात आली आहे. जुलै महिन्यापासून हे अभ्यासक्रम ऑनलाइन पद्धतीने सुरू केले जाणार आहेत.

वेबसाइटवर यादी प्रसिद्ध

‘स्वयम पोर्टल’च्या वेबसाइटवर या सर्व अभ्यासक्रमांची यादी प्रसिद्ध करण्यात आली आहे. देशातील विविध विद्यापीठे, नामांकित महाविद्यालयांमध्ये अनेक वर्षांच्या अध्यापनाचा अनुभव असलेल्या प्राध्यापकांनी हे ऑनलाइन; तसेच व्हिडिओद्वारे शिकवले जाणारे अभ्यासक्रम तयार केले आहेत. त्याची क्रेडिटही विद्यार्थ्यांना मिळणार आहेत. विशेष म्हणजे, पदवी ग्रहण करताना या क्रेडिटचा समावेश पदवीचे गुणपत्रक आणि प्रमाणपत्रामध्ये केला जाणार आहे.

Pune News : वराहमिहिरांच्या ‘या’ प्राचीन ग्रंथाद्वारे पर्जन्यमानाचा अंदाज बांधणे शक्य, अभ्यासकांचा विश्वास

विविध अभ्यासक्रमांचा समावेश

‘स्वयम पोर्टल’वर उपलब्ध असलेल्या अभ्यासक्रमांमध्ये ‘अॅनालिटिकल टेक्निक्स इन बायोकेमिस्ट्री’, ‘एनजीओ अँड सस्टेनेबल डेव्हलपमेंट’, ‘आयडेंटिफिकेशन ऑफ चिल्ड्रेन डेव्हलपमेंट’, ‘सप्लाय चेन मॅनेजमेंट’, ‘हिस्टरी ऑफ इंडिया’, ‘सोशल गव्हर्नन्स’, ‘सोशल सायकॉलॉजी’, ‘मॅथमॅटिकल इकोनॉमिक्स’, ‘रिअल अॅनालिसिस’ अशा विविध विद्याशाखांमधील वेगवेगळ्या अभ्यासक्रमांचा समावेश करण्यात आला आहे. याशिवाय नृत्य, संगीत, चित्रकला, शिल्पकला, नाट्य अशा ‘परफॉर्मिंग आर्ट्स’च्या विषयांचेही अभ्यासक्रम स्वयमद्वारे विकसित करण्यात आले आहेत.

डिसेंबर महिन्यात परीक्षा

अलीकडच्या काळामध्ये आवश्यक असलेले ‘डेटा सायन्स’, ‘डेटा अॅनालिसिस’, ‘सायबर क्राइम’, ‘आर्टिफिशियल इंटेलिजन्स’ या संदर्भातील अभ्यासक्रमही या पोर्टलवर उपलब्ध आहेत. जुलै ते ऑक्टोबर दरम्यान हे अभ्यासक्रम खुले करण्यात येणार असून, डिसेंबर महिन्यामध्ये त्याची परीक्षा घेतली जाईल, असे ‘स्वयम पोर्टल’वर प्रसिद्ध करण्यात आलेल्या परिपत्रकात स्पष्ट करण्यात आले आहे.

विद्यापीठाकडूनही अभ्यासक्रमांची निर्मिती

‘स्वयम पोर्टल’वर ऑनलाइन अभ्यासक्रमांच्या यादीत सावित्रीबाई फुले पुणे विद्यापीठाकडून तयार करण्यात आलेल्या काही अभ्यासक्रमांचाही समावेश करण्यात आला आहे. यामध्ये ‘जनरल सायकॉलॉजी’, ‘निगोसिएशन अँड कॉन्फ्लिक्ट मॅनेजमेंट’, ‘कंटेंपररी पॉलिटिकल इकोनॉमी’, ‘पब्लिक पर्सनल अॅडमिनिस्ट्रेशन’, ‘डेव्हलपमेंट ऑफ सायकोलॉजीकल थॉट’, ‘सायबर क्राइम अॅडमिनिस्ट्रेशन’, ‘पर्सनॅलिटी डेव्हलपमेंट अँड कम्युनिकेशन्स स्किल्स’, ‘इंडियन क्लासिकल डान्स’, ‘बिझनेस एथिक्स’ अशा विविध अभ्यासक्रमांचा समावेश आहे.

विद्यापीठाच्या वेबसाइटवर माहिती उपलब्ध

‘स्वयम’द्वारे विकसित करण्यात आलेल्या अभ्यासक्रमांना प्रवेश घेण्यासाठीची संपूर्ण प्रक्रिया सावित्रीबाई फुले पुणे विद्यापीठाच्या वेबसाइटवर उपलब्ध करण्यात आली असून, ‘स्वयम पोर्टल’वरही सर्व अभ्यासक्रमांची माहिती प्रकाशित करण्यात आली आहे.

अभ्यासक्रमांचा विद्यार्थ्यांना भविष्यात फायदा

‘स्वयम’द्वारे शिकवण्यात येणारे अभ्यासक्रम पूर्ण केल्यानंतर विद्यार्थ्यांना मिळणारी क्रेडिट पदवी, पदव्युत्तर अभ्यासक्रमात विचारात घेतली जाणार असल्याने भविष्यात या अभ्यासक्रमांचा विद्यार्थ्यांना फायदा होणार आहे. त्यामुळे अधिकाधिक विद्यार्थ्यांनी त्याचा लाभ घ्यावा, असे आवाहन विद्यापीठ प्रशासनाकडून करण्यात आले आहे.