कल्याणीनगर येथे झालेल्या अपघातातील अल्पवयीन आरोपीच्या रक्ताच्या नमुन्यात फेरफार केल्याच्या प्रकरणात वडिलांना मदत केल्याच्या आरोपाखाली, तसेच डॉ. अजय तावरे आणि डॉ. श्रीहरी हळनोर यांना पैसे दिल्याच्या प्रकरणात आरोपी मुलाची आई शिवानी अगरवालचाही सहभाग असल्याचं पोलीस तपासात समोर आलं आहे. शिवानी अगरवाल गेल्या काही दिवसांपासून आपल्या पुण्यातील घरी नव्हत्या, त्या कुठे गायब झाल्या आहेत, याचा थांगपत्ता लागत नव्हता. मात्र पुणे क्राईम ब्रांचने त्यांना शोधून काढत अटक केली. त्यांना आज कोर्टासमोर हजर करण्यात येणार असल्याची माहिती आहे.
भरधाव कारच्या धडकेत दोघांचे बळी घेणाऱ्या अल्पवयीन आरोपीला बालसुधारगृहात पाठवण्यात आलं आहे. मात्र आपल्या पोराचा गुन्हा लपवण्याच्या नादात अख्खं कुटुंबच गजाआड झालं आहे. आधी निष्काळजी बाळगणाऱ्या बिल्डर बाप विशाल अगरवाल याला बेड्या ठोकण्यात आल्या. त्यानंतर चालकाचं अपहरण आणि धमकवल्या प्रकरणी आजोबा सुरेंद्रकुमार अगरवाल गजाआड झाले. तर आता पतीला मदत करणारी शिवानी अगरवालही अटकेत आहे.
दरम्यान, कल्याणीनगर अपघात प्रकरणात आरोपी अल्पवयीन मुलाचा गुन्हा अंगावर घेण्यासाठी चालकाला बंगल्यात डांबून ठेवल्याप्रकरणी आरोपी सुरेंद्रकुमार अगरवाल आणि विशाल अगरवाल यांना न्यायालयाने १४ दिवसांची न्यायालयीन कोठडी सुनावली. त्यामुळे या बाप-लेकाचा मुक्काम आता येरवडा तुरुंगात असणार आहे. प्रथमवर्ग न्यायदंडाधिकारी ए. ए. पांडे यांनी हा आदेश दिला.
Pune Porsche Crash : अल्पवयीन आरोपीची आई संपर्काबाहेर, दादाला नोटीस, ‘त्या’ रात्रीचं गूढ उलगडणारRead Latest Maharashtra News Updates And Marathi News
‘पोर्शे’ कार भरधाव चालवून तरुण-तरुणीच्या मृत्यूस कारणीभूत ठरलेल्या अल्पवयीन मुलाचा गुन्हा स्वत:च्या अंगावर घेण्यासाठी चालकावा बंगल्यात डांबून ठेवून, त्याचा मोबाइल फोन काढून धमकावल्याप्रकरणी सुरेंद्रकुमार ब्रह्मदत्ता अगरवाल (७७) आणि विशाल सुरेंद्रकुमार अगरवाल (५०) यांच्यावर गुन्हा दाखल आहे. त्यामध्ये पोलिस कोठडीची मुदत संपल्याने शुक्रवारी त्यांना न्यायालयात हजर करण्यात आले.