पोलिसांनी दिलेल्या माहितीनुसार, सायबर चोरट्यांनी व्हॉट्सअ‍ॅपद्वारे संपर्क साधून शेअर मार्केटमध्ये गुंतवणूक केल्यास चांगला नफा मिळेल, असे सांगून विश्वास संपादन केला. त्यानंतर महिलेला एका व्हॉट्सॲप ग्रुपमध्ये सहभागी करण्यात आले. त्यांच्याकडून गुंतवणुकीच्या नावाखाली पैसे घेतले. मात्र, महिलेने पैशांची मागणी केली असता, पैसे मिळाले नाहीत. त्या वेळी आपली फसवणूक झाल्याचे लक्षात आल्यानंतर महिलेने पोलिसात धाव घेऊन तक्रार दाखल दिली. बिबवेवाडी येथील एका व्यक्तीला अशाच प्रकारे साडेतीन लाख रुपयांना गंडा घातला आहे.
पोलिस असल्याचे सांगून फसवले
कात्रज-कोंढवा परिसरातील एका महिलेला सायबर चोरट्यांनी पोलिस असल्याची बतावणी करून तरुणीवर गुन्हा दाखल असल्याची भिती दाखवून पाच लाख रुपये उकळले. या प्रकरणी, ३९ वर्षीय महिलेने भारती विद्यापीठ पोलिस ठाण्यात तक्रार दिली आहे. गौरव शुक्ला, रमेश देव यांच्या विरोधात गुन्हा दाखल केला आहे. आरोपींनी तरुणीला ते दिल्ली पोलिस दलातील अधिकारी बोलत असल्याचे सांगून संपर्क केला. तरुणीला विश्वास वाटावा म्हणून बनावट ओळखपत्रदेखील पाठवले. त्यानंतर तुमच्या विरुद्ध आमच्याकडे गुन्हा दाखल असून, अटक होईल असे धमकावले. मात्र, त्यामध्ये मदत करून केस क्लिअर करण्याबरोबरच ‘एनओसी’ देण्यात येईल, असे सांगून पैसे उकळले.
अर्धवेळ नोकरीच्या आमिषाने गंडा
अर्धवेळ नोकरीचे आमिष दाखवून कोंढव्यातील ४२ वर्षीय व्यक्तीची सायबर चोरट्यांनी ११ लाख ४४ हजार रुपयांची फसवणूक केली. टेलिग्राम अ‍ॅपच्या माध्यमातून सायबर चोरट्यांनी संपर्क साधून हॉटेल आणि रेस्टॉरंटला रेटिंग देण्याच्या बहाण्याने फसवणूक केली. या प्रकरणी, कोंढवा पोलिसांनी गुन्हा दाखल केला आहे. कोंढवा येथील साईबाबानगर येथे २९ वर्षीय तरुणाचीदेखील अशाच पद्धतीने चार लाख २६ हजारांची फसवणूक झाली आहे.
टास्क फ्रॉडचे दोन गुन्हे
हडपसर येथील तरुणीला टास्क रिव्ह्यू देण्याच्या बहाण्याने नऊ लाख ५३ हजार रुपयांचा गंडा घातला आहे. या प्रकरणी ३१ वर्षीय तरुणीने दिलेल्या तक्रारीनुसार हडपसर पोलिसांनी सायबर चोरट्यांच्या विरोधात गुन्हा दाखल केला आहे. मगरपट्टा येथील ३४ वर्षीय तरुणीचीदेखील सायबर चोरट्यांनी प्रिपेड टास्क देऊन आठ लाख ६१ हजारांची फसवणूक केली आहे.