मुंबई : मनुस्मृती दहन आंदोलन करताना मनुस्मृती आणि डॉ. बाबासाहेब आंबेडकर यांचे एकत्रित चित्र असलेले पोस्टर फाडण्यावरून झालेल्या वादंगानंतर राष्ट्रवादीचे नेते आमदार जितेंद्र आव्हाड यांनी जाहीर व्हिडीओ प्रसिद्ध करून माफी मागितली आहे. शालेय अभ्यासक्रमात मनुस्मृतीचा समावेश करण्याचा प्रयत्न विद्यमान राज्य सरकार करत आहे. याला विरोध म्हणून महाड येथील क्रांती स्तंभ येथे मनुस्मृतीचे दहन करून याचा निषेध करत असताना अनवधानाने माझ्याकडून मोठी चूक घडली. माझ्या बापाचा अवमान झाला. याबद्दल मी सर्व आंबेडकरीप्रेमींची माफी मागतो, असे आव्हाड यांनी स्पष्ट केले.राष्ट्रीय शैक्षणिक धोरणानुसार, ‘एससीईआरटी’ने राज्याच्या शालेय अभ्यासक्रमात ‘मनुस्मृती’मधील दोन श्लोकांचा समावेश करण्याचा प्रस्ताव मांडला आहे. त्याचा निषेध म्हणून आमदार जितेंद्र आव्हाड यांनी डॉ. बाबासाहेबांनी जिथे मनुस्मृती जाळली होती, त्या महाडमध्ये जाऊन आंदोलन केले. येथील चवदार तळ्यावर जाऊन आव्हाड यांनी मनुस्मृतीचे दहन केले. परंतु हे आंदोलन करत असताना मनुस्मृती आणि डॉ. बाबासाहेब आंबेडकर यांचे एकत्रित चित्र असलेले पोस्टर आव्हाड यांनी फाडले. बाबासाहेबांचे चित्र असलेले पोस्टर फाडल्यावरून विरोधी पक्षांनी आव्हाड यांना लक्ष्य केल्यानंतर आव्हाडांनी व्हिडीओ जारी करून माफी मागितली.
शालेय अभ्यासक्रम आराखड्यातील मनुस्मृतीचा भाग वगळा नाहीतर… वर्षा गायकवाड यांचा कडक इशारा
जितेंद्र आव्हाड यांची जाहीर माफी
शालेय अभ्यासक्रमात मनुस्मृतीचा समावेश करण्याचा प्रयत्न हे सरकार करत आहे. याचा विरोध म्हणून आज महाड येथील क्रांती स्तंभ येथे मनुस्मृतीचे दहन करून याचा निषेध केला. हे करत असताना अनावधानाने माझ्याकडून एक मोठी चूक घडली. मनुस्मृतीचे निषेध करणारे पोस्टर्स काही कार्यकर्त्यांनी आणले होते. त्यावर बाबासाहेब आंबेडकर यांचे देखील चित्र होते. मनुस्मृती आणि डॉ. बाबासाहेब आंबेडकर यांचे एकत्रित चित्र असणारे हे पोस्टर माझ्याकडून अनावधाने फाडण्यात आले. मी याबद्दल जाहीर माफी मागतो, असे आव्हाड म्हणाले.
…तर प्रागतिक विचारांच्या संस्था स्वस्थ बसणार नाही, मनुस्मृतीतील श्लोक शिकविण्यावरून शरद पवार यांचा इशारा
बाबासाहेबांचा अवमान माझ्याही जिव्हारी लागलाय
गेली अनेक वर्ष डॉ. बाबासाहेब आंबेडकर यांच्या विचारांवर चालण्याचा मी प्रयत्न करत असतो ही बाब सगळ्यांना माहिती आहे. डॉ. बाबासाहेबांचा माझ्याकडून अनावधानाने झालेला हा अवमान माझ्यादेखील जिव्हारी लागलेला आहे. मी आजवर कोणत्याच बाबींवर माफी मागितलेली नाही.मी कायमच माझ्या भूमिकेवर ठाम राहून ती निभावलेली आहे.मात्र आज मी माफी मागतोय,कारण हा माझ्या बापाचा अवमान माझ्याकडून झालेला आहे. सर्व आंबेडकरप्रेमी जनता मला माफ करतील, अशी अपेक्षा आव्हाड यांनी व्यक्त केली.
