तलावमध्ये माशांचा खच, तब्बल ६०० किलो मासे मृत अवस्थेत, नेमकं काय कारण?

मिरजेच्या गणेश तलावमध्ये कोणत्या तरी अज्ञात कारणावरून गेले दोन दिवसापासून मासे मृत होत असून तलावातील पाणी प्रदूषित झाल्याची भीती व्यक्त केली जात आहे. गेले दोन दिवसात आरोग्य विभागाच्या कर्मचाऱ्यांनी गणेश तलावमध्ये स्वच्छ्ता मोहीम राबवून सुमारे 600 किलोपेक्षा जास्त मृत मासेबाहेर काढून त्याची विल्हेवाट लावली आहे. पाणी प्रदूषित झाल्यामुळे मासे मृत झाल्याचे बोलले जात आहे..सांगली महापालिका आरोग्य विभागाकडून या घटनेची गंभीर दखल घेण्यात आली असून तलावातील पाण्याचे नमुने तपासणीसाठी लॅबमध्ये पाठवण्यात आले आहेत. तसेच यापुढे पाण्याचे प्रदूषण करणाऱ्यावर कारवाईचा इशारा महापालिकेच्या उपायुक्त विजया यादव यांनी दिला.

गणेश तलाव मध्ये कचरा धार्मिक विधीचे निर्माल्य नागरिकांच्या कडून मोठ्या प्रमाणात टाकले जात असल्याने तलावातील जलचर प्राण्यांचे जीवन धोक्यात आले आहे. कचरा टाकण्यासाठी नागरिकांनी निर्माल्य कुंडाचा वापर करावा अशी कित्येक वेळा महापालिका प्रशासना कडून सूचना दिल्या असताना गणेश तलाव मध्ये कचरा टाकला जातो, तलाव परिसरातील खाऊंच्या गाड्या ही गणेश तलाव प्रदूषणाला कारणीभूत ठरत आहेत. त्यामुळे महापालिका प्रशासन ॲक्शन मूडमध्ये आले असून गणेश तलाव मध्ये कचरा अथवा निर्माल्य टाकल्यास कडक कारवाई करण्यात येईल असा आदेश उपायुक्त यांनी दिला आहे.