मुंबई: मुंबईच्या धारावी परिसरात मोठी आग लागली. सहा जण जखमी झाल्याची माहिती आहे. शॉर्ट सर्किटमुळे ही आग लागल्याची प्राथमिक शक्यता वर्तवली जात आहे. सध्या जखमींवर मुंबईच्या सायन रुग्णालयात उपचार सुरु आहेत. अशोक मिल कंपाऊंडमधील जिम आणि काही दुकानं या आगीत जळाली आहेत.
धारावीच्या ९० फीट रोड येथे अशोक मिल कंपाऊंड येथे सकाळी ३ वाजून ५२ मिनिटांनी ही आग लागली. त्यानंतर अग्निशमन दलाला पाचारण करण्यात आलं. तात्काळ अग्निशमन दलाच्या १० गाड्या घटनास्थळी दाखल झाल्या. त्यानंतर आगीवर नियंत्रम मिळवण्यात अग्निशमन दलाच्या जवानांना यश आलं.
पहाटे करंटमुळे अचानक शॉर्ट सर्किट झाला. जिथे ही आग लागली तिथे लॉक होतं त्यामुळे सुरुवातील काहीही कळालं नाही. जेव्हा धूर निघू लागला तेव्हा सारे लोक घाबरुन बाहेर पडले. त्यानंतर अग्निशमन दलाला माहिती देण्यात आली. अग्निशमन दलाला येण्यास उशीर झाला, तोपर्यंत आग खूप पसरली होती, अशी माहिती तिथल्या रहिवाशाने दिली.
सध्या या प्रकरणात सहा जण गंभीर जखमी झाल्याची माहिती आहे. तर, आगीवर पूर्णपणे नियंत्रण मिळवण्यात आलं आहे.