काय आहे प्रकरण?
संतोष भास्कर अडसूळ (वय ४१, रा. मोरे सोसायटीसमोर, शेवाळेवाडी, मांजरी फॉर्म) असे मृत व्यक्तीचे नाव असून, राहुल दत्तात्रय घुले (वय ४०, रा. मांजरी बुद्रुक) असे आरोपीचे नाव आहे. पोलिसांनी दिलेल्या माहितीनुसार, संतोष आणि राहुल एका बांधकामाच्या ठिकाणी मद्यपान करत होते. त्या वेळी त्यांच्यात किरकोळ कारणांवरून वाद झाला. त्यामध्ये राहुलने संतोषला मारहाण करून, डोके आपटले. त्यात संतोष बेशुद्ध पडला. ते पाहून राहुल पळून गेला. संतोष घरी न परतल्यामुळे त्याचे वडील घटनास्थळी आले असता, त्यांना संतोष बेशुद्धावस्थेत दिसला. त्यांनी तत्काळ पोलिसांना माहिती दिली. पोलिसांनी संतोषला रुग्णालयात नेले असता, उपचारापूर्वी त्याचा मृत्यू झाल्याचे डॉक्टरांनी सांगितले. ससून रुग्णालयात शवविच्छेदन केले असता, त्याच्या शरीरावर अनेक जखमा दिसून आल्या.
दरम्यान, महिनाभरामध्ये हडपसर पोलिस ठाण्याच्या हद्दीमध्ये झालेला हा तिसरा खून आहे. मांजरी येथे एका महिलेचा गळा दाबून खून केल्याची घटना घडली होती. तर, हांडेवाडी रोड येथे १०० रुपये दिले नाहीत, म्हणून एकाने मजूर मित्राचा खून केला होता.