ठाकरे यांची साथ सोडून मुख्यमंत्री शिंदे यांचे नेतृत्व स्वीकारलेल्या गजानन कीर्तिकर यांनी सोमवारी प्रसारमाध्यमांच्या प्रतिनिधींशी बोलताना राज्यात लोकसभा निवडणुकीत महाविकास आघाडीला यश मिळणार असल्याचे सांगत महायुतीच्या पराभवाचे संकेत दिले. कीर्तिकर यांच्या विधानाने शिंदे गटात खळबळ उडाली आहे. या पार्श्वभूमीवर शिशिर शिंदे यांनी एकनाथ शिंदे यांना पत्र पाठवून गजानन कीर्तिकर यांच्या हकालपट्टीची मागणी केली आहे. निवडणुकीत राज्यातील पाचव्या टप्यातील मतदानाच्या दिवशी शिवसेना नेते आणि माजी खासदार गजानन कीर्तिकर यांनी आणि त्यांच्या पत्नीने पक्षविरोधी वक्तव्य करून विरोधी पक्ष ठाकरे गटाची बाजू घेतली आहे. त्यामुळे ‘मातोश्रीचे लाचारश्री’ होणाऱ्यांना पक्षातून त्वरित बाहेरचा रस्ता दाखवावा, अशी मागणी शिशिर शिंदे यांनी पत्रात केली आहे.
गजानन कीर्तिकर यांचे चिरंजीव अमोल कीर्तिकर यांना ठाकरे गटाने उत्तर-पश्चिम मुंबई लोकसभा मतदारसंघातून उमेदवारी दिली. त्यांनतर अमोल कीर्तिकर हे गजानन कीर्तिकर यांच्याच कार्यालयातून कारभार करीत होते. तसेच, गजानन कीर्तिकर शिवसेनेत असतानाही त्यांचा खासदारनिधी अमोल कीर्तिकर यांनी स्वत:च्या प्रचारासाठी आणि विकासकामांसाठी वापरला. त्यामुळे त्यांचा शिवसेना पक्षाला शून्य लाभ झाला. मात्र, फायदा ठाकरे गटाला झाला. परवा मतदानाच्या दिवशी गजानन कीर्तिकर यांच्या पत्नीने मुख्यमंत्र्यांचा एकेरी उल्लेख करीत ठाकरे गटाची बाजू घेतली. गजानन कीर्तिकर यांना मातोश्रीवर लोटांगण घालण्याची घाई झालेली आहे. गजानन कीर्तिकर यांचे हे उद्योग पक्षाला बदनाम करीत आहेत. त्यामुळे आता त्यांची पक्षातून त्वरित हकालपट्टी करावी आणि त्यांना निरोपाचा नारळ द्यावा, असे शिंदे यांनी पत्रात नमूद केले आहे.
…तर शिंदे पडले नसते : अमोल कीर्तिकर
दरम्यान, शिशिर शिंदे यांच्या मागणीचा अमोल कीर्तिकर यांनी समाचार घेतला आहे. गजानन कीर्तिकर यांच्या हकालपट्टीची मागणी कोण करतोय? शिशिर शिंदे कोण, असे म्हणायची वेळ आल्याची टीका अमोल कीर्तिकर यांनी केली. राजकारणात कसे वागले पाहिजे, याबाबत बाबांचा सल्ला घेतला. आमचा ऊहापोह तेथेच असतो. गजानन कीर्तिकर यांनी जो निर्णय घेतला, तो त्यांचा वैयक्तिक होता. आता वेगळा निर्णय घेतला, तर तो त्यांचा वैयक्तिक असेल. माझे अमोल गजानन कीर्तिकर हे नाव कायम असणार आहे. ते कोणी चोरू शकत नाही. खासदार म्हणून गेली दहा वर्षे माझ्या वडिलांनी केलेल्या कामाचा फायदा मला होईल. त्यामुळे शिशिर शिंदे यांनी एवढा अभ्यास केला असता, तर ते कधीच पडले नसते. मुलुंडकरदेखील उद्धव ठाकरे यांच्यासोबत आहेत, असे अमोल कीर्तिकर यांनी सांगितले.
Shrikant Shinde : निकालाआधी बॅनरची घाई, श्रीकांत शिंदे-राहुल शेवाळेंचे विजयी बॅनर, तर बारणेंना केंद्रात मंत्रिपदRead Latest Maharashtra News Updates And Marathi News
अमोलला बिनविरोध आणण्याचा कट : दरेकर
उत्तर पश्चिम लोकसभा मतदारसंघातून शिवसेनेची उमेदवारी मिळाल्यानंतर ऐनवेळी अर्ज मागे घेऊन आपल्या मुलाला अर्थात अमोल कीर्तिकर यांना बिनविरोध खासदार करण्याचा गजानन कीर्तिकर यांचा कट होता, असा थेट गंभीर आरोप प्रवीण दरेकर यांनी केला आहे. मुख्यमंत्री एकनाथ शिंदे यांच्याकडून आधी उमेदवारी मिळवायची आणि अमोल कीर्तिकर समोर आपणच उमेदवार म्हणून उभे राहायचे. साहजिकच दुसरा कोणी उमेदवार नसेल आणि अर्ज मागे घेण्याच्या अंतिम क्षणी आपला उमेदवारी मागे घेण्याचा गजानन कीर्तीकर यांच कट होता, असेही दरेकर म्हणाले. शिंदे गटाचे प्रवक्ते आणि मंत्री दीपक केसरकर यांनी एकत्रित बसून हा वाद मिटविण्याचे आवाहन केले आहे.