लोकसभा निवडणुकीच्या पाचव्या टप्प्यातील महाराष्ट्रातील १३ जागांसाठी सोमवारी मतदान होत आहे. निवडणुकीच्या या टप्प्यात मुंबई उत्तरमधून भाजपचे उमेदवार आणि केंद्रीय मंत्री पियुष गोयल, कल्याणमधून शिवसेनेचे श्रीकांत शिंदे, दिंडोरीतून भारती पवार, भिवंडीतून कपिल पाटील, मुंबई उत्तर मध्य मतदारसंघातून वकील उज्ज्वल निकम, यांसारख्या दिग्गजांची प्रतिष्ठा पणाला लागली आहे. मुंबई उत्तर मध्यमधून शहर काँग्रेसच्या वर्षा गायकवाड आणि दक्षिण मुंबईतून अरविंद सावंत यांची उमेदवारी पणाला लागली आहे.
आदित्य ठाकरेंनी व्यक्त केली चिंता
आदित्य ठाकरे यांनी या भागात मतदानाचा वेग मंदावल्याबद्दल चिंता व्यक्त केली. याशिवाय, मुंबईतील बोरिवलीतील अनेक भागात मतदान यंत्रांमध्ये बिघाड झाल्यामुळे लांबच लांब रांगा लागल्याचे वृत्त आहे. सकाळपासून रांगेत थांबलेल्यांची अद्यापही पाळी आली नसल्याचे दिसून आले आहे. याप्रकरणी शिवसेनेच्या (उद्धव गट) नेत्याने निवडणूक आयोगाकडे तक्रार केली आहे. बोरिवली, मुंबई मधील अनेक ठिकाणी मतदान यंत्रांमध्ये बिघाड झाल्याचे अहवाल सांगतात. काही भागात मतदान यंत्रात बिघाड झाल्याची नोंद आहे. असे उघड झाले आहे की लोक त्यांच्या मतदानाच्या संधीची आतुरतेने वाट पाहत दीर्घ कालावधीसाठी रांगेत उभे आहेत. या ठिकाणी पिण्याच्या पाण्याची आणि व्हीलचेअरची व्यवस्था नाही. रांगेत उभे असलेले लोक निवडणूक आयोगाला मतदानाचा कालावधी वाढवण्याची विनंती करत आहेत. सायंकाळी मतदानासाठी मतदार मोठ्या संख्येने येतात. मात्र, सकाळच्या मतदारांना अद्याप मतदान करता आले नसल्यामुळे अनेकांना अडचणीेंना सामना करावा लागत आहे.
उद्धव ठाकरेंनी व्यक्त केला संताप
शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनीही यासंदर्भात एक पत्रकार परिषद घेऊन नाराजी व्यक्त केली. संथ गतीने मतदान होत असल्याने निवडणूक आयोगाची तक्रार कोर्टात करणार असल्याचेही त्यांनी सांगितले. उद्धव ठाकरे संताप व्यक्त करत निवडणूक आयोगावर अतिशय गंभीर असे आरोप केले आहेत. तसेच उद्धव ठाकरे यांनी नागरिकांना मतदान केल्याशिवाय घरी न जाण्याचं आवाहन केलं आहे. “आज २० तारीख आहे. आपण अशावेळेला भेटतोय की, महाराष्ट्राच्या मतदानाचा शेवटचा टप्पा पुढच्या एक-दीड तासांमध्ये थांबणार आहे. मी सकाळपासून विविध भागांची माहिती घेत आहे. मतदारांमध्ये उत्साह खूप आहे. निवडणूक आयोगाकडून प्रत्येकाला दहा-दहा, बारा-पंधरा मेसेज जात आहेत की, मतदान करा म्हणून. त्याप्रमाणे मतदार उतरलेले दिसत आहेत. खूप गर्दी दिसत आहे. पण निवडणूक आयोग हा पक्षपातीपणा करतोय, असं स्पष्ट दिसतंय”, अशी भूमिका उद्धव ठाकरे यांनी मांडली आहे.
दरम्यान, यापूर्वी महाराष्ट्राचे उपमुख्यमंत्री देवेंद्र फडणवीस यांनीही मतदान संथगतीने होते असल्याची तक्रार ट्विटरवर केली होती. सुरूवातीला केलेल्या ट्विटमध्ये फडणवीस म्हणाले की, मुंबई तसेच परिसरात संथ गतीने मतदान होत असल्याच्या तक्रारी अनेक ठिकाणांवरुन येत असल्याने निवडणूक आयोगाच्या यंत्रणेने त्यात तातडीने लक्ष घालून मतदानाचा वेग कसा वाढेल, याकडे लक्ष द्यावे, अशी विनंती उपमुख्यमंत्री देवेंद्र फडणवीस यांनी आयोगाकडे केली आहे.
तसेच मुंबई आणि मुंबई उपनगर अशा दोन्ही जिल्हाधिकार्‍यांशी चर्चा करुन मतदारांना कुठल्याही प्रकारचा त्रास होणार नाही, तसेच मतदानाची गती वाढेल, याकडे लक्ष देण्यास सांगितले आहे.
उद्धव ठाकरे यांच्या पत्रकार परिषदेनंतर पुन्हा फडणवीसांचे ट्विट
मुंबईत संथ गतीने मतदान होत असल्याची तक्रार सर्वप्रथम आम्हीच आयोगाकडे केली. आता मात्र, नेहमीप्रमाणे उद्धव ठाकरे यांनी त्यांचे रडगाणे सुरु केले आहे. पराभव समोर स्पष्ट दिसत असताना त्यांनी सवयीप्रमाणे मोदीजींवर आरोप करणे प्रारंभ केले आहे. 4 जूननंतरच्या स्थितीला सामोरे जाण्याची पार्श्वभूमी ते आताच तयार करीत आहेत. शिवाय निवडणूक प्रक्रियेतील अधिकाऱ्यांना धमक्याही दिल्या जात आहेत.
माझी तमाम मुंबईकरांना विनंती आहे की, मतदान केंद्रावर जा आणि मोठ्या संख्येने मतदान करा. 6 वाजले तरी जितके लोक आतमध्ये असतील, त्या प्रत्येकाला मतदान करता येते. त्यामुळे मतदानाचा आपला हक्क बजावल्याशिवाय राहू नका.