शिंदे मुख्यमंत्री नको म्हणणारे पहिले नेते अजित पवार, भाजपचाही विरोध, राऊतांचा मोठा दावा

मुंबई: २०१९ मध्ये आमच्याकडून मुख्यमंत्रीपदासाठी एकनाथ शिंदे यांचंच नाव समोर करण्यात आलं होतं. पण, भाजपच्या वरिष्ठ नेत्यांना हे मान्य नव्हतं. तसेच, २०१९ मध्ये जेव्हा आम्ही महाविकास आघाडीसोबत सरकार स्थापन केलं तेव्हा शिंदेंच्या मुख्यमंत्रीपदाला विरोध करणारे पहिले नेते हे अजित पवार, सुनील तटकरे आणि दिलीप वळसे पाटील होते, असा दावा शिवसेना उबाठा गटाचे खासदार संजय राऊत यांनी केला आहे.

आम्ही तयार होतो पण, अजित दादा, तटकरेंचा नकार

शरद पवार असतील राहुल गांधी असतील, या दोघांचं एकमत होतं की सरकारचं नेतृत्त्व अशा चेहऱ्याने करावं की महाविकास आघाडीतील प्रत्येक घटकाला ते मान्य असेल. एकनाथ शिंदे हे मुख्यमंत्रीपदी नकोत, आम्ही त्यांच्या हाताखाली काम करणार नाही. हे सांगणारे सगळ्यात पहिले हे सुनील तटकरे, अजित पवार आणि दिलीप वळसे पाटील होते.

आम्ही वरिष्ठ आहोत, आम्ही त्यांच्या हाताखाली काम करणार नाही, ही त्यांची भूमिका होती. २०१९ मध्ये जेव्हा मुख्यमंत्री पदावरुन भाजप-सेनेत वाद सुरु होता, तेव्हाही विधीमंडळ पक्षाच्या नेतेपदजी एकनाथ शिंदे यांचीच निवड झाली होती. शिवसेनेकडून शिंदे यांचंच नाव पुढे गेलं असतं, पण, भाजपच्या वरिष्ठ नेत्यांनी त्यांनी निरोप पाठवला होता की दिल्लीचा निर्णय काय येतो माहिती नाही पण आम्हाला एकनाथ शिंदे मुख्यमंत्रीपदी चालणार नाही.

शिंदे तेव्हा कोणालाच नको होते – संजय राऊत

हे फडणवीसांपासून ते भाजपच्या सर्व प्रमुख नेत्यांची भूमिका होती. शिंदे तेव्हा कोणालाच नको होते. शिंदे यांचा अनुभव कमी होता. शिंदे यांच्या कामाची पद्धत ही पैसा फेको तमाशा देखो हीच असल्याने अनेकांना ते आपल्या आसपास नको होते. त्यांनी राज्याचं नेतृत्त्व करावं ही भाजप किंवा राष्ट्रवादीच्या वरिष्ठ नेत्यांची भूमिका नव्हती. ही भाजपची भूमिका होती. तर आमची अशी भूमिका होती की शिंदेंना विधीमंडळाचे नेते म्हणून नेमणूक केली असल्याने कदाचित ते मुख्यमंत्री होतील.